काठमाडौं– पार्टी घोषणापछिको जिम्मेवारी पुरा गर्नेमा नयाँ शक्तिमा महिला नेतृ अगाडि देखिएका छन् । पार्टीको केन्द्रीय अनुगमन कार्यदलले सवैभन्दा राम्रो काम महिला संयोजक रहेको प्रदेशमा रहेको निश्कर्ष निकालेको छ । पुरुषको तुलनामा महिला नेतृ संयोजक रहेको प्रदेशमा राम्रो काम भएको कार्यदलको प्रतिवेदनमा छ ।

नयाँ शक्तिको सोमवारबाट शुरु भएको केन्द्रीय कार्यकारीणी समितिमा कार्यदलले आफ्नो प्रतिवेदन पेश गरेको थियो । नयाँ शक्तिको सात नम्वर प्रदेश संयोजक लिला भण्डारीले आफ्नो प्रदेशमा अन्य प्रदेशको तुलनामा राम्रो काम गरेको रिपोर्ट दिएको हो । भण्डारी पूर्व शिक्षा राज्य मन्त्री हुन् ।

बामदेव क्षेत्रीको संयोजकत्वमा कार्यदल बनेको थियो । कार्यदलले कार्तिक पहिलो सातादेखि एक महिना काम गरेको थियो । सवै प्रदेशको कामको अवलोकन गरेर कार्यदलले आफ्नो रिपोर्ट दिएको थियो ।

कार्यदलको प्रतिवेदनको अंश

कार्यकारीणी समितिका एक केन्द्रीय सदस्यका अनुसार क्षेत्रीले वैठकमा भनेका थिए, ‘हामी अन्य प्रदेशमा पनि गयौँ, सात प्रदेशमा पुग्दा पार्टी बनेको अनभूति भयो । पार्टी छ भन्ने लाग्यो । समस्या त छन् । तर, अनेत्र भन्दा धेरै राम्रो पायौँ । त्यहाँ पार्टीका सवै विभागले राम्रो काम गरेको पाइयो ।’

नयाँ शक्तिको प्रदेश १ मा पासाङ शेर्पा, प्रदेश २ मा महेन्द्र पासवान, प्रदेश ३ मा गंगा श्रेष्ठ, प्रदेश ४ मा बलावती शर्मा, प्रदेश ५ मा सुरेन्द्र चौधरी, प्रदेश ६ मा झत्तबहादुर शाह र प्रदेश ७ मा लिला भण्डारी संयोजक छन् ।

सोमवारबाट शुरु भएको नयाँ शक्तिको वैठकमा विभिन्न ६ वटा कार्यदलले तयार पारेको कार्ययोजनाका विषयमा छलफल भएको छ । गत कार्तिक ३ गते बसेको पार्टीको विशेष राजनीतिक समितिको बैठकले पार्टीको आगामी योजना, संगठन निर्माण, आर्थिक स्रोत परिचालन लगायतका विषयमा कार्ययोजना तयार गर्नका लागि ६ वटा कार्यदल निर्माण गरेको थियो । ६ वटा कार्यदलले तयार परेको कार्य योजनालाई मूर्तरुप दिन बैठक केन्द्रित छ ।

आर्थिक स्रोत परिचालन सम्बन्धि कार्ययोजनामा पार्टीको खर्च व्यवस्थापनका लागि पार्टी सदस्यता तथा नविकरण शुल्क निर्धारण गरिने उल्लेख गरिएको छ । पार्टीको अगुवाईमा क्षेत्रगत रुपमा लघुवित्त कम्पनी, सहकारी संस्था, जलविद्युत आयोजना, होटल, कृषि सहकारी आदि संचालन गरी रोजगारी र स्वरोजगारी सृजना गर्ने प्रस्ताव पनि तयार गरेको छ ।

तीन दिन चल्ने बैठकमा पार्टी केन्द्रिय कार्य समितिका सदस्यहरु, आमन्त्रित सदस्यहरु, संरक्षण समितिका सदस्यहरु, विशेष आमन्त्रित सदस्यहरु सहित १ सय ५० जनाको सहभागिता छ ।

नयाँ शक्तिको एक सय सदस्यीय केन्द्रीय कार्यकारीणी परिषद्मा ३४ जना महिला छन् । @ रातोपाटी |