मंसिर ४, काठमाडौं : सातदोबाटोस्थित एन्फा कम्प्लेक्समा भएको नेपाल र जापानबीचको मैत्रीपूर्ण खेलमा जापानलाई हराउँदै नेपाल विजयी भएको छ। जापान विरुद्धको खेलमा नेपाल १–० ले विजयी भएको हो। खेलको ५७ औं मिनेटमा नवयुग श्रेष्ठले नेपालको लागि गोल गरेका हुन्।

नवयुगको प्रहारअघि जापानी गोल पोस्टमा विमल घर्तीले दिएको पास विक्रम लामाले प्रहार गरे । तर, जापानी गोल रक्षकले बल नियन्त्रणमा लिन नसक्दा फुत्कियो र सोहि मौकाको सदुपयोग गर्दै नवयुगले गोल गरेका हुन्। निर्धारित ९० र अतिरिक्त पाँच मिनेटको खेलमा नेपाल एक गोल सहित विजयी भएको हो ।

नेपालले खेल अवधिभर जापानलाई पूर्णरुपमा प्रतिरक्षा गरेर जित निकालेको हो। खेलमा विक्रम लामा म्यान अफ द म्याच भए।

केही दिनअघि मलेसियामा एएफसी सोलिडारिटी कपको उपाधि जितेर आएको नेपाली टोलीले जे लिग तथा विश्वभर व्यावसायिक फुटबल खेल्ने जापानी खेलाडीको सामना गरेको हो। जापानी टोलीमा रहेका टोडा काजुयुकी सन् २००२ को विश्वकपमा जापानका तर्फबाट तथा इंग्लिस क्लब टोटेनह्यामबाट व्यावसायिक फुटबल खेलिसकेका खेलाडि सहितको १६ जनाको टोलीले नेपालसँग प्रतियोगितामा खेलेको हो।

खेल नेपाल र जापानको द्वौत्य सम्वन्ध स्थापना भएको ६० वर्ष पुगेको अवसरमा अखिल नेपाल फुटबल संघ एन्फाले कलरबाथसँग मिलेर आयोजना गरेको हो।

खेलबाट संकलन भएको सबै रकम भूकम्प प्रभावितका लागि खर्च गरिने एन्फाले जनाएको छ।