कार्तिक ३० आफूलाई डा सुहाना भनेर चिनाउँदै दर्जनौं युवालाई मायाजालमा पारेर ठगी गर्ने गुल्मीकी भगवती केसी गत वर्ष पक्राउ परिन् । डाक्टर भनेर परिचय दिँदा केटाहरुलाई सजिलै आकर्षित गर्न सकिने भएकाले उनले त्यो तरिका अपनाएकी थिइन् ।

त्यस्तै आफूलाई ‘रोयल फेमेली’सँग जोडेर अर्की एक युवतीले युवाहरुको बिचल्ली पारेकी छिन् । इटहरीकी २२ वर्षिया फेमिना चापागाईले धेरैजनासँग बिहे गर्दै युवाहरुलाई ठगी गरेको घटना सार्वजनिक भएको छ । तर, उनलाई भने प्रहरीले पक्राउ गर्न सकेको छैन ।

फेसबुकबाटै चिनजान गरी उनले तीन जना व्यक्तिलाई ठगी गरेको उजुरी प्रहरीमा परिसकेको छ । एक दर्जनभन्दा धेरैलाई उनले ठगी गरेको प्रहरीको आशंका छ । सुरुमा मलेसियामा कार्यरत एक युवालाई फेसबुकबाटै चिनजान गरी उनी मलेसिया घुम्न मात्र गइनन्, मलेसियाकै मन्दिरमा बिहे समेत गरिन् ।

आफू जर्मनी बस्ने र बिहे गरेर दुवै जना जर्मनी जाने प्रलोभनमा उनले ती युवालाई लोभ्याइन् । जर्मनी जानका लागि ५० लाख लाग्ने बताउँदै ती युवासँग उनले ठूलो रकम ठग्न खोजेकी थिइन् । तर ती युवकसँग ५० लाख रुपैयाँ थिएन । तर पनि ती युवासँग ५ लाख रुपैयाँ मात्र उम्काउन सफल भइन् ।

मलेसियामा हनिमुन मनाएर उनी एक्लै नेपाल फर्किइन् । फेसबुकबाटै नेपालमा अर्का मुर्गा फसाइसकेकी थिइन् । विराटनगरका एक धनाढ्य परिवारका युवालाई उनले आफ्नो प्रेमजालमा फसाएकी थिइन् । भेटेको केही दिनमा युवकले फेमिनालाई पाथिभरा मन्दिरमा लगेर बिहे गरे, ।

गत वर्ष माघ २१ गतेको घटना थियो त्यो । बिहे गरेपछि मात्र परिवारलाई जानकारी दिए । किनकि फेमिनाको सुन्दरतासँग उनी त्यसत धेरै मोहित भइसकेका थिए । उता मलेसियामा रहेका श्रीमानलाई जर्मनी जाने प्रक्रिया मिलाइरहेको भन्दै झुलाएकी थिइन् ।

तर बिस्तारै फेमिनामाथि शंका लाग्न थालेपछि ती युवा नेपाल आए । नेपाल आएर बुझ्दा उनले अर्को केटासँग बिहे गरिसकेको खुल्यो । उनी फेमिनाको विषयमा बुझ्न विराटनगरस्थित फेमिनाले बिहे गरेको घरमा पुगे । त्यसपछि मात्र दुवै युवक फेमिनाको जालमा परेको थाहा पाए ।

त्यतिमात्र होइन उनीले काठमाडौंको एक होटलका कर्मचारीलाई पनि मायाजालमा पारेर जर्मनी लैजाने भन्दै ठगी गरेकी थिइन् । महानगरीय अपराध महाशाखामा फेमिनाविरुद्ध तीन वटा उजुरी परेको छ । तर, प्रहरीले उनलाई पक्राउ गर्न सकेको छैन । सोर्सफोर्सका कारण उनी पक्राउ नपरेको स्रोत बताउँछ ।

फेमिनाको फेसबुकमा पूर्वराजा ज्ञानेन्द्र, पूर्वयुवराज्ञी हिमानीसँग खिचिएका तस्विर छन् । त्यस्तै राप्रपा नेपालका अध्यक्ष कमल थापासँगको फोटो समेत छ । फेसबुकमा आकर्षक फोटोहरु उनले पोष्ट गरेकी छिन् । तीनै फोटोहरुमार्फत् धेरै युवकहरुलाई ठगी गरिसकेको प्रहरीले जनाएको छ ।

उनको वास्तविक नाम भने विद्या सरकार भएको खुलेको छ । उनको बुबा आमा नभएकाले इटहरीका कातिक सरकारले छोरी बनाएर उनलाई नागरिकता निकालिदिएको बुझिएको छ । रोयल फेमेलीको देखाउन उनले आफूसँग रातो पासपोर्ट भएको भन्दै भ्रममा पार्ने गरेकी थिइन् । @दृष्टिखबर