अमेरिकी राष्ट्रपति पदमा नवनिर्वाचित डोनाल्ड ट्रम्प निर्वाचन ताका निकै आक्रमक देखिएका थिए । मेक्सिकोमा पर्खाल लगाउने देखी लिएर अमेरिकामा रहेका मुस्लिम लखेट्ने, अप्रवासीहरुलाई आफ्नै देश फिर्ता पठाउने लगायतका निकै चर्का भाषणा गरेर चर्चामा आइरहन्थे ।

निर्वाचनका ताका पनि उनले वर्तमान राष्ट्रपति बाराक ओबामाले ल्याएको ओबामा केयरको खुलेरै विरोध कगरेका थिए भने प्रतिद्धन्द्धी हिलारी क्लिन्टनको पनि खुलेरै आलोचना गर्ने गरेका थिए ।

तर बुधबार भएको राष्ट्रपतिय निर्वाचनपछि भने उनीमा एकाएक परिवर्तनहरु देखिन थालेका छन् ।चुनावी अभियानमा बाराक ओबामालाई गैर अमेरिकी भएको र राष्ट्रघाती आरोप लगाउँदै आएका ट्रम्पले पहिलोपटकको भेटपछि उनै ओबामालाई निकै असल मानिस रहेको प्रतिकृया दिएका थिए ।

त्यस्तै ओबामाले प्रस्तुत गरेको ओबामा केयरको पनि ट्रम्प कुनैबेला कट्टर आलोचक थिए । तर यस विषयमा पनि उनले ओबामासँगको भेटपछि बोली फेरेका छन् । अब आएर उनले भनेका छन्, ‘ ओबामा केयरका केही प्रावधानलाई निरन्तरता दिनेछु ।’

त्यस्तै आफ्नो चिर प्रतिद्धन्द्धी हिलारी क्लिन्टनलाई पनि राष्ट्रपतिका लागि अयोग्य महिला रहेको बताएका थिए । हिलारीलाई इमेलकाण्डसँग मुछेर उनले भनेका थिए, ‘उनी एक अपराधी हुन् । यदि म अमेरिकाको राष्ट्रपति भएँ भने जेल पठाउनेछु ।’

तर हिलारीविरुद्ध खरो उत्रिएका ट्रम्प अहिले आएर भने उनीप्रति निकै सफ्ट देखिन थालेका छन् । ट्रम्पले एउटा टेलिभिजन अन्तर्वाताका क्रममा ट्रम्पले हिलारीलाई निकै स्ट्रङ र पावरफुल ओमन भनेका छन् ।

उनले आफुले राष्ट्रपति पदमा निर्वाचित भएपछि क्लिन्टनको प्मले भरिएकाे टेलिफेान कल पाएकाे भन्दै पूर्व राष्ट्रपति बिल क्लिन्टन र हिलारी क्लिन्टनको तारिफ गरेका हुन् । श्रीमती र छोरासँगै उपस्थित भएर उनले भनेका छन्, ‘उनी एक बलियो प्रतिद्धन्द्धी थिइन् । उनलाई धेरैधेरै धन्यवाद् ।’

यिनै विविध र कडा टिप्पणीका कारण ट्रम्पलाई कुनैबेला राक्षसीको संज्ञा पनि दिइएको थियो । तर ट्रम्पको पछिल्ला अभिब्यक्तीले भने उनी राष्ट्रपति पदमा निर्वाचित भइसकेपछि थप जिम्मेवार र संवेदनशील भएको अनुमान लगाउन थालिएको छ । त्यसो त कतिपयले अमेरिकामा उनी विरुद्ध भएको आन्दोलन मत्थर पार्नकै लागि ट्रम्पको यस्तो अभिब्यक्ती आएको हुनसक्ने अनुमान लगाएका छन् ।