सप्तरी, कात्तिक २८ – प्रेम विवाह गरेकी सरस्वती चौधरी सासु, ससुरा र जेठाजुद्वारा घर निकाला गरिएपछि बिचल्लीमा पर्नुभएको छ ।डेढ वर्ष अघि सप्तरीको रायपुर–८ का २२ वर्षे प्रकाश यादवसँग प्रेम विवाह गरी घर भित्रिएकी रायपुरकै २० वर्षे सरस्वती चौधरी अहिले घर निकाला गरेपछि विचल्लीमा पर्नुभएको हो ।

गाउँमा आफ्नो बारेमा कुनै सुनुवाई नभएपछि २० दिने छोरासहित न्याय खोज्दै आइतवार सदरमुकाम राजविराज आइपुगेको चौधरीले बताउनुभएको छ । उहाँले न्यायका लागि पहल गरिदिन पनि आग्रह गर्नुभएको छ । उहाँले डेढ वर्षदेखि पति प्रकाशसँग मिलेर बस्दै आए पनि केही दिन यता ससुरा परशुराम, सासु तथा जेठाजु लालले घर छाड्न दबाब दिनुका साथै शारीरिक र मानसिक यातना दिन थालेकाले घर छाड्न बाध्य भएको बताउनुभयो ।

प्रकाशको अर्कै बिहे गर्ने उद्देश्यले यस्तो षडयन्त्र बुनिएको उहाँको भनाई छ । घर नछाडे ज्यानै मार्नेसम्म धम्की दिने गरेका सासु, ससुरा र जेठाजुले पछिल्लो पटक कात्तिक ३ गते पति प्रकाश घर बाहिर रहेको मौका छोपी कुटपिट गर्दै घर निकाला गरेको उहाँले बताउनुभयो ।

गर्भवती अवस्थामै घर निकालामा परेकी सरस्वतीले कात्तिक ५ गते माइतमै छोरो जन्माउनुभएको थियो । पति प्रकाशको भने अहिले अत्तोपत्तो छैन ।

सरस्वतीले पनि प्रकाशलाई पटक–पटक मोवाइलमा सम्पर्क गर्न खोज्दा स्वीच अफ गरिएको बताउनुभयो । ‘श्रीमान प्रकाशलाई मसँग सम्बन्ध छोडाउन सासु, ससुरा र जेठाजुको मिलेमतोमा भगाइएको हो’ उहाँले भन्नुभयो– ‘अब यो काखे बालक र आफ्नो गुजारा कसरी चल्छ, यही पिरले निन्द्रा र भोक सबै हराएको छ ।’

यस विषयमा गाउँमा पटक–पटक बैठक बसी परशुरामले सरस्वतीलाई बुहारी स्वीकार्ने र अब कुनै किसिमको दुव्र्यवहार नगर्ने बाचा गरेपनि व्यवहारमा त्यसो नदेखिएको स्थानीयबासिन्दा विशेश्वर चौधरीले बताउनुभयो ।

यसबारे पीडित पक्षबाट जिल्ला प्रहरी कार्यालयमा समेत उजुरी परेको छ । उजुरीमा घर निकालामा परेकी सरस्वतीलाई पुनः घर भित्र्याउने तथा शान्ति सुरक्षाका साथ बस्न पाउने वातावरणका लागि आग्रह गरिएको पीडित युवतीकी आमा चिन्ता देवीले बताउनुभयो । प्रहरीले यसबारे तत्कालै अनुसन्धान गरी आवश्यक कारबाही गर्ने आश्वासन दिएको छ । @ उज्यालो अनलाईन