याम्बु , २७ कार्तिक  । तामाङ साहित्य धेरै जसो प्रेम र निरासामा सिमित भएकोले अबको दिनमा प्रगातिवादी धारमा तामाङ साहित्य जान जरुरी छ । आज तामाङको पहिलो लेखक बुद्धिमान मोक्तानको ११७ औं जन्मजयन्ती तथा तामाङ डाजाङको नियमित साहित्यिक वाजनको १५८ औं श्रृंखलामा नेपाल तामाङ घेदुङका केन्द्रीय अध्यक्ष मोहन गोलेले बताउनु भएको हो ।

तामाङ डाजाङले काठमाडौंमा आयोजना गरेको उक्त कार्यक्रममा मोक्तानले लेख्नु भएको जिक्तेन तामछ्योइ (तामाङ वंशवाली ह्रामा) माथि छलफल भएको थियो । सोही क्रममा भाषाविद् अमृत योन्जन तामाङले तामाङका नयाँ पुस्ताले अब तामाङको फाराब, सेरब र इतिहासहरुको बारेमा पनि थेसिस् लेख्नु पर्ने बताउनु भएको छ ।
कार्यक्रममा लेखक रविन्द्र ग्याबा, लेखक प्रताप बल, लेखक ढुपवाङगेल मोक्तान, अधिवक्त फुर्पा तामाङ, शिक्षक घेदुङका अध्यक्ष मोहन कुमार लामा, नेपाल तामाङ घेदुङ प्रवास शाखा साउदी अरबका अध्यक्ष बिगेन्द्र सिंह वाइबा तामाङ र पत्रकार बुद्ध लोप्चनले पनि बुद्धिमान मोक्तान र उहाँको पुस्तक माथि आ–आफ्नो भनाइ राख्नु भएको थियो ।

तामाङ डाजाङको १५८ औं (ग्योइकाइ गेताङ) साहित्यिक श्रृंखलामा अर्जुन ग्लान, फुर्पा तामाङ, बिगेन्द्र सिंह वाइबा, फूलकुमार बम्जन, साम्देन दोङ, तेज योन्जन, रचना मोक्तान, अमिर योन्जन, बुद्धराम थिङ, अस्मिता घिसिङ, हिरामाया घिसिङ (ललितपुर), ङेमा थाङ्पाल, लक्ष्मी रुम्बा, लगायतका स्रष्टाहरुले तामाङ भाषामा रचना प्रस्तुत् गरेका थिए ।

बुद्धिमान मोक्तानको जन्म वि.स.१९५६ कात्र्तिक २७ गते (१२ नोभेम्बर १८९९) रंगबुल बस्ती भारतमा भएको थियो भने २०२६ बैशाख ९ गते (२१ अप्रिल १९६९) गते बुद्धनिवास, कागझोडा दार्जीलिङमा ७० वर्षको उमेरमा स्वर्गारोहण भएको थियो । उहाँले तामाङ जातिको पहिलो पुस्तक जिक्तेन तामछ्योइ २०१३ साल (सन् १९५६) मा खेख्नु भएको थियो । जुन पुस्तक आम तामाङ समुदायको लागि प्रेरणाको स्रोत बनेकोले पनि तामाङ डाजाङले हरेक वर्ष उहाँको जन्मजयन्ती मनाउदै आएको हो ।
कार्यक्रम तामाङ डाजाङका अध्यक्ष सन्चु ब्लोनको अध्यक्षता तथा प्रेम बहादुर थोकर तामाङको संयोजकत्वमा सम्पन्न भएको थियो । @ तामाङ दाजाङ