२६ कातिक, काठमाडौं ।नेपाल तामाङ घेदुङ ३ नम्बर (ताम्सालिङ) प्रदेश समितिका अध्यक्ष सोमबले ताामाङले तामाङ जनताको मुक्तिको लागि आफू बन्दूक बोक्न पनि तयार रहेको बताएका छन् । नेपाल तामाङ घेदुङ प्रदेश समितिले आज घेदुङको हलमा प्रादेशिक भेला तयारीको लागि आयोजना गरेको बैठकमा बोल्दै उनले यस्तो बताएका हुन् ।

‘१० बर्षे माओवादी जनयुद्धमा बन्दूक बोकियो तर प्रतिक्रियावादीहरुले हाम्रो ताम्सालिङ पहिचान स्थापित गर्न दिएनन्’ उनले भने– ‘नेतृत्वले निर्देशन गरे फेरि ताम्सालिङको लागि हतियार बोक्न तयार छु’ । उनले माओवादी जनयुद्धमा लागेर बटुलेको हतियार युद्धको अनुभव फेरि प्रयोग गर्नुपरे त्यो सबैको लागि खतरा हुने बताए ।

बैठकले ताम्सालिङ बृहत् प्रादेशिक भेला सम्पन्न गर्नको लागि प्रदेश अध्यक्ष सोमबले तामाङको संयोजकत्वमा ७७ सदस्यीय मूल आयोजक समिति गठन गरेको छ । बैठकले आगामी पुष ११ गते काठमाडौंमा शक्ति प्रदर्शन सहितको भेला सम्पन्न गर्ने निर्णय गरेको प्रदेश सचिव अरुण लामा तामाङले बताए । उनले भने– ‘हामी भेला भब्य र सभ्य रुपमा सम्पन्न गर्न ताम्सालिङ प्रदेश अन्तर्गतका १३ वटै जिल्लालाई परिचालन गर्नेछौ’ ।

भेला सफल बनाउन काठमाडौं स्थित रत्नपार्कबाट ताम्बा, लामा र बोन्बो सहितको बिशाल ¥याली निकाल्ने तयारी गरिएको आयोजकले जनाएको छ । मूल आयोजक समितिमा केन्द्रीय समितिका सदस्यहरु, प्रदेश समितिका सदस्यहरु र १३ वटा जिल्लाका अध्यक्षहरु रहेका छन् ।

सोही क्रममा घेदुङका केन्द्रीय अध्यक्ष मोहन गोले तामाङले बर्तमान सङ्घीय संरचनामा ताम्सालिङ प्रदेशको ब्यवस्था नगरिएको हुँदा शक्ति प्रदर्शन सहितको भेला आयोजना गर्न बैठकमा विशेष निर्देशन दिएका छन् । उनले तामाङ समुदायको ऐतिहासिक भूमिलाई अधिकार सम्पन्न ताम्सालिङ प्रदेश निर्माण र राज्यसत्ताको हरेक अङ्ग, तहमा तामाङ जनताको समानुपातिक प्रतिनिधित्वको सुनिश्चितता नभएसम्म आन्दोलन जारी रहने बताएको समाचार तामाङघेदुङ डट ओआरजीमा छ |