कार्तिक २७, काठमाडौं : नयाँ शक्ति नेपालका संयोजक तथा पूर्वप्रधानमन्त्री बाबुराम भट्टराईले अंगिकृत नागरिकलाई राष्ट्रको प्रमुख कार्यकारी बनाउन नहुने बताएका छन् ।

अमेरिका जस्तो देशमा त जन्मको आधारमा मात्र प्रमुख कार्यकारी बन्न भन्दै उनले अंगिकृत नागरिकलाई कार्यकारी प्रमुख बनाउने कुरा बेठीक भएको धारणा राखे। बेलायत आधुनिक औद्योगिक क्रान्तिको केन्द्र रहेको चर्चा गर्दै उनले लण्डन शहर १८ औं, १९ सौं शताब्दीमै विकास र समृद्धिको केन्द्र रहेको स्मरण गर्दै भने, ‘हाम्रोमा राजनैतिक परिवर्तन ढिला भएकोले हामी आर्थिक क्रान्तिमा अघि बढ्नै पर्छ।’ उनले विकास र समृद्धिलाई केन्द्रमा राखेरै नयाँ शक्ति जन्माएको दाबी समेत गरे।

आफनो पार्टीको भ्रातृ संस्था अन्तर्राष्ट्रिय नेपाली समाज बेलायतले आइतवार आयोजना गरेको बृहत कार्यकर्ता भेलामा भाग लिन भट्टराई लण्डन आएका हुन्। पार्टीका अन्य नेताहरु मदन राई, डिवी गुरुङ तथा भट्टराईका स्वकीय सचिव विश्वदीप पाण्डे र विदेश विभाग प्रमुख नवराज सुवेदीले समेत सो भेलालाई सम्वोधन गर्ने कार्यक्रम रहेको छ।

भट्टराई शनिवार गोर्खाली समाज यूकेको आयोजनामा हुने च्यारिटी कार्यक्रमा सहभागी हने छन्। यस्तै सोमवार नोभेम्बर साँझ लण्डन स्कुल अफ इकोनोमिक्स र मंगलवार अक्सफोर्ड युनिभर्सिटीमा ‘नेपालको आर्थिक विकास र सम्भावना’ विषयमा अन्तरक्रिया गर्ने कार्यक्रम रहेको छ। भट्टराईको स्वागतकालागि हित्रो विमानस्थलमा बेलायतका लागि नेपाली राजदूत दूर्गा बहादुर सुवेदी, अन्तर्राष्ट्रिय नेपाली समाज बेलायतका संयोजक भोला खनाल, नेपाली दूतावास लन्डनका प्रवक्ता शरद आरन लगायत पार्टीका स्थानीय नेता तथा कार्यकर्ताको उपस्थिति थियो ।