कार्तिक २३  |नेपाली राष्ट्रिय फुटबल टिम ३–० ले ब्रुनाईलाई पन्छाउँदै मंगलबार एएफसी सोलिडारिटी कपको सेमिफाइनलमा प्रवेश गरेको छ । मलेसियाको कुचिङस्थित सरावत स्टेडियममा हात पारेको जितसँगै ४ अंक जोडेको नेपाल समूह ‘ए’ विजेताको रुपमा अन्तिम चारमा प्रवेश गरेको हो । नेपालले पहिलो खेलमा टिमोर लेस्टेसँग गोलरहित नतिजा निकालेको थियो । पहिलो खेलमा टिमोर लेस्टेमाथि ४–० को जित रचेको ब्रुनाईको एक खेलअगावै सेमफिाइनल यात्रा निश्चित भएको थियो ।

उपाधिको दाबेदार मानिएको नेपालले अब सेमिफाइनलमा लाओस वा मंगोलियाको सामना गर्नेछ । ब्रुनईमाथि हात पारेको जितमा नवयुग श्रेष्ठ, भरत खवास र विमल घर्तीमगरले गोल गरे ।

नवयुग श्रेष्ठको गोलसँगै नेपालले पहिलो हाफको इन्ज्युरी टाइममा १–० को अग्रता लिएको थियो । मिडफिल्डर हेमन गुरुङले प्रहार गरेको बल ब्रुनाईका डिफेन्समा लागेपछि पेनाल्टी क्षेत्रमा रहेका फरवार्ड नवयुगले पाएका थिए । त्यसमा उनले प्रहार गरेको बल ब्रुनाईका गोलकपिरले रोकिदिए । फेरि बल उनले नै पाए र यसपटक भने उनले सहज गोल गर्दै नेपाललाई पहिलो हाफको इन्ज्युरी टाइममा अग्रता दिलाएका थिए ।

आर्मीका फरवार्ड नवयुग श्रेष्ठले नेपाली राष्ट्रिय टिम बंगबन्धु गोल्डकप च्याम्पियन हुदा ४ र १२ औं सागमा नेपाल यू २३ ले स्वर्ण जित्दा ७ गोल गरेका थिए । पहिलो हाफमा ब्रुनाईले पनि दुईपटक डरलाग्दा आक्रमण गरेका थिए । तर, त्यसमा नेपाली डिफेन्स र गोलकिपर किरण चेम्जोङले बल क्लियर गर्दै नेपालको संकट टारेका थिए ।

भरत खवासले ७२ औं मिनेटमा गरेको गोल उत्कृष्ट रह्यो । विमलको कर्नरमा नवयुगको हेड पासमा प्राप्त बललाई १८ यार्ड लाइनको ठीक भित्रबाट भरतको ‘भली’ सुन्दर गोलमा परिणत भएपछि नेपालको अग्रता दोब्बर भयो ।

नेपालको तेस्रो गोल विमलले पेनाल्टीमार्फत् गरे । उनले ८० औं मिनेटमा बायाँ खुट्टाले बललाई पोष्टको दिशा दिएका थिए । नवयुगले पास दिएको बल लिन दौडने क्रममा उनलाई ब्रुनाईका डिफेन्सले तानेर लडाएपछि नेपालले त्यस पेनाल्टीको अवसर पाएको थियो ।

नेपालले ब्रुनाईलाई पहिलोपल्ट पराजित गरेको हो । यसअघि यी दुई टिम एकपटक मात्र खेलेका थिए । सन् २००६ मा बंगलादेशमा भएको एएफसी च्यालेन्ज कपको समूह चरणमा ब्रुनाईले नेपाललाई २–१ ले हराएको थियो ।