कार्तिक २३, धनगढी :  कांग्रेसका महामन्त्री डाक्टर शसांक कोईरालाले, पार्टी सभापति शेरबहादुर देउवाले भारतमा दलाई लामालाई भेट्नु भनेको चिनिया नागरिकलाई चिढाउनु भएको बताए ।

प्रेस युनियन कैलालीले मंगलबार धनगढीमा आयोजना गरेको पत्रकार सम्मेलनमा महामन्त्री कोईरालाले यस्तो बताएका हुन । ‘पार्टी सभापति देउवाले भारतमा गएर किन ‘फ्रि तिब्बत’ का नेतालाई भेटे ? त्यो कुरा पार्टीलाई केही थाहा छैन’ उनले भने ।

काँग्रेसको नीति ‘एक चीन’ भएको स्पष्ट पार्दै महामन्त्री कोईरालाले लामासँगको भेटघाट पार्टी सभापतिको ब्यक्तिगत भएको पनि बताए । ‘काँग्रेस उत्तरी छिमेकी चीन र दक्षिणको छिमेकी भारतसँग समदुरीमा बस्न चाहन्छ’ उनले भने ।
धर्म निरपेक्ष नरुचाएका महामन्त्री कोईरालाले, हिन्दु राष्ट्रका लागि जनमत संग्रहमा जानुपर्ने बताए । ‘अहिले संविधान कार्यान्वयनका लागि राज्यको पुर्नसंरचनाको काम भईरहेको छ, अर्कोतिर महाभियोगको कुरा चर्चामा छ, अझ मुलकुका सामु तीन/तीन वटा निर्वाचनको चुनौती छ, त्यसैले हिन्दु राष्ट्रको कुरा अहिले नै चर्चामा ल्याउनु हुदैन’ उनले भने ।

तीन वटा चुनाव सकिएपछि, धर्म निरपेक्षताका लागि जनतामा जानुको विकल्प नरहेको कोईरालाको दाबी थियो । भारतले अहिले अंगीकृतको कुरा उठाएको चर्चा गर्दै ‘भारतले सोनीया गान्धीलाई प्रधानमन्त्री हुन नदिने अनी नेपालमा अंगीकृतलाई प्रधानमन्त्री राष्ट्रपति बनाउनुपर्छ भन्नुमा कुनै नैतिक आधार छैन’ उनले भने ।

‘नेपाल सानो मुलुक भएकाले, भुपरिवेष्ठित भएकैले भारतीय नागरिकले नेपालका सम्पत्ती किन्न पाउदैन, यो सन १९५० को सन्धीमै छ, सानो मुलुक भएका नाताले यसको स्वतन्त्रताका लागि भारतले नै त्यो सन्धीमा हस्ताक्षर गरेको छ’ उनले भने ।