पेरिसडाँडाबाट पूर्वलडाकुलाई हटाउदैमा समस्याको समाधान हुन्छ त ?
काठमाडौं । माओवादी केन्द्रको केन्द्रीय कार्यालय पेरिसडाँडामा धर्नामा बसेका पूर्वलडाकुहरुलाई प्रहरीले हटाएको छ ।सोमबार दिउँसोबाट बर्हिगमित पूर्वलडाकुहरुले माओवादी केन्द्रको केन्द्रीय कार्यालय कोटेश्वरस्थित पेरिसडाँडाको मूल गेटमा ताला लगाएर धर्नामा बसेका थिए । बालबच्चासहित राति पनि धर्नामा बसेका उनीहरुलाई मंगलबार बिहान प्रहरीले नियन्त्रणमा लिएको हो ।
उनीहरुले ‘अयोग्य’को बिल्ला हटाउनुपर्ने, गणतन्त्रका योद्दा घोषणा गर्नुपर्ने, जनसेना सरह व्यवहार गर्नुपर्ने, पक्राउ परेकाहरुलाई तत्काल रिहा गर्नुपर्ने, घाइतेहरुको उपचार गर्नुपर्ने लगायत माग राख्दै आएका छन् ।सेना समायोजनका क्रममा तत्कालीन जनमुक्ति सेनाबाट चार हजार नौ जनालाई अयोग्य लडाकु भन्दै शिविरबाट निकालिएको थियो ।
पार्टी कार्यालय घेराउ गर्न बहिर्गमित जनमुक्ति सेना नेपालका अध्यक्ष लेनिन विष्टसहित करिब दुई सय पूर्वलडाकु पेरिसडाँडामा बसेका थिए ।यसअघि पनि उनीहरूले माओवादी केन्द्रीय कार्यालयमा ५७ दिनसम्म धर्ना दिएका थिए ।
