कार्तिक १७ ,काठमाडौं : लक्ष्मी पुजाको दिन मात्र बिमलसँग उनका बुबा बलबहादुर तामाङले फोनमा कुरा गरेका थिए । उनी सम्झँदै छन्, ‘बुवा नआत्तिनू। केही हुदैन मलाई ।’ त्यसको एक दिनपछि छोराको मृत्युको खबर आयो । अहिले बलबहादुरको परिवार शोकमा डुबेका छन् ।

भारतको जम्मुकाश्मीरमा धरानका २० वर्षीय बिमल तामाङ मारिएपछि उनको परिवार शोकमा डुबेका हुन् । जम्मुकाश्मीरको हमिरपुरमा कार्यरत रहेका बेला पाकिस्तानी सेनाको गोली लागी धरान–११, सोलिङमार्गका विमल तामाङको मंगलबार निधन भएको हो । निधन भएका बिमल तामाङ भारतीय सेनाको ७÷११ गोर्खा राइफलमा कार्यरत थिए ।

छोराको मृत्युको खबरले शोकमा डुबेको आमा नरमाया स्याङ्बोले भारतीय सेनाले बिमलको शव परिवारलाई नबुझाई उतै दाह संस्कार गरेपछी थप पिडामा परेको बताए । उनको परिवारले बिमलको सम्झनामा फोटो राखेर बौद्ध धर्मशास्त्र अनुसार दाह संस्कार गरिरहेको छ । बलबहादुरका तीनजना छोरा मध्ये माहिलो छोरा किशोर र कान्छो छोरा बिमल भारतीय सेनामा कार्यरत छन् ।

बिमल २०७० साल असार १३ गते धरानबाट भारतीय सेनामा भर्ती भएका थिए । भर्तीपछि तालिम सकेर लखनउ बसेका उनी गत जेष्ठ महिनामा मा मात्रै जम्मू पुगेका थिए । त्यही क्रममा हरेक दिन गरिने पेट्रोलिङका क्रममा फर्किदाखेरी फायरिङमा परी उनको मृत्यु भएको बताइएको छ ।

बलबहादुरका माइलो छोरो किशोर १/११ जिआरमा कार्यरत छन् । बिमलका दाजु किशोरले भारतीय सेनामा कार्यरत रहदा लडाईमा मारिएका जवानहरुलाई भारतीय सेनाको नियम अनुसार उतै दाहसंस्कार गरिएको बताए ।