हेटौँडा नापी कार्यालयमा आगलागी, एक दर्जन कर्मचारी घाईते
कार्तिक १० , हेटौँडा : जिल्ला नापी कार्यालय मकवानपुरमा आगलागी भएको छ । दमकलको सहायतामा जनपथ,सशस्त्र प्रहरी, नेपाल आर्मी र स्थानीयबासीहरुले करिब दुई घण्टा लगाएर आगो नियन्त्रणमा लिएको मकवानपुर प्रहरी प्रमुख एसपी मिरा चौधरीले बताईन् ।
आगलागीमा परी करिब एक दर्जन कर्मचारी तथा सेवाग्राही घाईते भएको उनले जानकारी दिईन् । हेटौँडाको कान्तिराजपथस्थित भाडाको घरको दोस्रो तल्लामा रहेको कार्यालयमा आगलागी भएपछि आत्तिएर हाम फाल्ने र आगोको धुवामा निसास्सिएर सेवाग्राही तथा कर्मचारीहरु घाईते भएको एसपी चौधरीले बताईन् । घाईतेहरुको स्थानीय अस्पतालहरुमा उपचार भईरहेको छ ।
कार्यालयको तल्लो तलामा रहेको होटलमा रहेको ग्याँस लिक भएर आगलागी भएको हुनसक्ने प्रहरीको अनुमान छ । आगलागीका कारण नापी कार्यालयका महत्वपूर्ण कागजातहरु जलेर नष्ट भएको प्रहरीले जनाएको छ । आगलागीबाट भएको क्षति र घाईतेहरु एकिन हुन बाँकी रहेको मकवानपुर प्रहरी प्रमुख चौधरीले बताईन् ।