कार्तिक ९,काठमाडौं : पूर्वी पाल्पाको जल्पा–७ मा रहेको जल्पाडाँडाँमा भेटिएको अजिङ्गर सुरक्षित स्थानमा सार्न स्थानीयले माग गरेका छन् । भञ्याङ्गबजार माथिको डाँडोमा कात्तिक ४ गते भेटिएको अजिङ्गर कटुबास, बाँस र मेहालको रुखमा चढ्ने र झर्ने गरिरहेको छ ।

जिल्लामै पहिलो पटक देखा परेको अजिङ्गर हेर्न दिन दिनै भिड लागेको छ । आफूहरुले बर्षेनी पूजा गर्ने स्थानमै अजिङ्गर भेटिएपछि दैनिक पूजा गरेको स्थानीयबासिन्दा बेदप्रसाद बस्यालले बताउनुभयो ।

गाउँलेहरुले अजिङ्गर बसेको स्थान वरपरका रुखमा धजा बाधेका छन् भने नरिवल, स्याउ, दूध र कुखुरा समेत चढाएका छन् । खतरा हुन सक्ने भन्दै ताहु प्रहरी चौकीले पनि प्रहरी खटाएर स्थानीयलाई अजिङ्गर नजिक जान नदिएको जल्पा– ९ का स्थानीयबासिन्दा सुरेन्द्र सारुले जानकारी दिनुभयो ।

मंगलबार अजिङ्गर भेटिएको स्थानमा पुगेर जिल्ला वन कार्यालय पाल्पाको टोलीले स्थानीयलाई त्यसका बारेमा जानकारी दिएका छन् । संरक्षित वन्यजन्तुमा पर्ने अजिङ्गर शान्त स्वभावको हुने भएकाले यसले कुनै क्षति नपुर्याउने सहायक वन अधिकृत महम्मद अतिउल्लाहले बताउनुभयो । अजिङ्गर वरपर भिडभाड नगर्न र नजिस्क्याउन उहाँको आग्रह छ । जलवायु परिवर्तनले गर्दा नदी किनार, पानी जमेका स्थान, तराईलगायतका स्थानमा भेटिने अजिङ्गर पाल्पामा देखिएको जानकारहरुले बताएका छन् ।

फोटो खिच्न अजिङ्गर नजिक जाने, बढी हल्ला गर्ने र धर्म हुन्छ भन्दै त्यसको पछाडिको भाग छुने गरेकाले त्यसो नगर्न पनि प्रहरी र वन कार्यालयका कर्मचारीहरुले आग्रह गरेका छन् । केही महिना अघि पनि पाल्पाको अर्गलीमा राजगोमन भेटिएको थियो ।