असोज १९, दक्षिण कोरियामा मंगलबार रातीदेखि बुधबार दिउँसोसम्म शक्तिशाली तुफान आएको छ। मंगलबार जेजु टाँपुबाट सुरु भएको आँधी तुफान बुधबार बिहानदेखि कोरियाको दक्षिणी भेगमा दिनभर आएको थियो।

विशेषगरी दक्षिणी भेगका केही क्षेत्रमा प्रति सेकेन्ड ५६ दशमलब ५ मिटरको हुरी चल्नुका साथै दुई सय पचास मिलिमिटर भन्दा बढी पानी परेको थियो। हुरी बतास र झरीका कारण केही व्यक्ति घाइते हुनुका साथै बुसानमा चार जनाको मृत्यु भएको कोरियन समाचार एजेन्सीले जनाएको छ।

आँधीका कारण समुद्र नजिक नजान र घरमा सावधानी अपनाउन सर्वसाधारणलाई जानकारी गराइएको थियो। कोरियाको दक्षिणी भेगमा रहेको विभिन्न शहर तथा ग्रामिण भेगहरुमा ठुलो वर्षाका कारण घरभित्रै पानी पसेको छ। यो वर्षको १८औं आँधीका कारण केही समयअघि क्यङजुलाई केन्द्रविन्दु बनाएर गएको भूकम्पले क्षति पुर्याएका घरहरुमा झनै असर परेको छ। त्यस्तै डुबानले गर्दा अन्डरग्राउन्ड पार्किङमा राखिएका गाडीहरु डुबेका छन्।

आँधीहुरी र झरीका कारण बुधबार स्थानीय विद्यालयहरुमा पठनपाठन भएन। जेजुमा ठुलो आँधीका कारण विधुतीय तारमा क्षति पुगेकाले ५२ हजार घरमा विद्युत आपुर्ती ठप्प छ। त्यस्तै जेजु र बुसानको हवाइ उडान समेत रद्ध हुनुका साथै राष्ट्रिय तथा अन्तर्राष्ट्रिय पानी जहाज मार्ग पनि स्थगित गरिएको छ। कोरियाको तीव्र गतिको केटिएक्स रेल सेवा पनि तुफानका कारण रोकिएको सुरक्षा मन्त्रालयले जनाएको छ।