ओभरटेक गर्दा पोखरामा बस दुर्घटना,२ को मृत्यु, २३ घाईते
असोज १७, पोखरा : पोखराको हेमजाको स्थित याम्दी पुल नजिकै बस दुर्घटना हुँदा २ जनाको मृत्यु भएको छ । बसमा सवार २३ जना घाइते भएका छन् । दुर्घट्नामा मृत्यू हुनेमा गुल्मी जिल्लाको नेटा गाविस–२ घर भएकी ४७ बर्षिय मनरुपा अर्याल र उनका दुई बर्षिय नाती अतित अर्याल रहेको जिल्ला प्रहरी कार्याल कास्कीले बताएको छ ।
काठमाडौंबाट बाग्लुङको बुर्तिबाङ गइरहेको ग.१ ख.६१६९ नम्बरको रात्री बस याम्दी पुल नजीक दुर्घटना भएको हो । पोखराबाट बाग्लुुङ तर्फ नै गइरहेको बसले अर्कोलाई ओभरटेक गर्ने क्रममा बस अनियन्त्रित हुँदा सोमवार बिहान दुर्घटना भएको स्थानियबासीले जानकारी दिएका छन् । घुम्तीमा ओभरटेक गर्न खोज्दा बस अनियन्त्रित भई दाइने तर्फहुँदै सडकवाट तल खसी दुर्घट्ना भएको प्रहरीको भनाई छ ।
दुर्घट्नालगतै संगै आइरहेको अर्को बसका चालक तथा यात्रुहरुले घाइतेहरुको उद्धार गरेका थिए । घाइतेहरुको पोखराको मनिपाल शिक्षण अस्पताल र पश्चिमाञ्चल क्षेत्रीय अस्पतालमा उपचार भइरहेको छ ।
