असोज १६,हङकङ:  हङकङको काउलोनस्थित जोर्डनमा ‘ग्याङ फाइट’ गर्ने नेपालीमाथि प्रहरीले गोली प्रहार गरेको छ। आइतबार बिहानै भएको ग्याङ फाइट र प्रहरीको गोली लागेर घाइते भएका तीन जनालाई अस्पताल भर्ना गरिएको छ। गोली लागि एक जना नेपाली युवा गम्भीर घाईते भएको जनाईएको छ ।

भिडन्तस्थल नेपालीको बाक्लो बसोबास रहेको जोर्डनको पार्कस् स्ट्रिटलाई सिल गरी प्रहरीले अनुसन्धान गरिरहेको छ।

स्थानीय एप्पल न्यूजले जनाए अनुसार आइतबार बिहान ६ बजे नै चक्कु र धारिला हतियार लिएका दुई नेपाली समूहबीच भइरहेको ‘ग्याङ फाइट’ रोक्न प्रहरीले कम्तिमा तीन राउण्ड गोली प्रहार गरेको थियो। ति युवाहरुबीच के कति कारणले झगडा भएको थाहा हुन सकेको छैन । यसै स्थानमा एक महिना अघि एकजना नेपाली युवामाथि छुरा प्रहार गरिएको थियो ।

हङकङ प्रहरीको भनाईमा बिहान बीच सडकमा साँघातिक हतियार बोकेर लडिरहेका एक दर्जन युवाहरुलाई नियन्त्रणमा लिन गोली चलाउनु परेको हो। आफ्नै अगाडि हानहान गर्दै ट्याक्सी लिएर भाग्न खोजेपछि दुई जना प्रहरीले गोली प्रहार गरी नेपाली युवालाई नियन्त्रणमा लिएका थिए। जोर्डनस्थित प्रत्यक्षदर्शी एक नेपाली युवाका अनुसार एक जनालाई खुट्टा र अर्कोलाई पाखुरामा गोली लागेको छ। चक्कु हानाहानमा २ जना युवा गम्भीर घाईते भएको जनाईएको छ ।

नजिकको क्वीन एलिजावेथ अस्पतालमा उपचार भइरहेका उनीहरूको नाम खुलेको छैन।घटनास्थलमा रहेका एक प्रहरीले हङकङमा पछिल्लो समय नेपालीबीच बढेको ग्याङ फाइटमध्ये यो घटना निकै गम्भिर रहेको र त्यही अनुसार अनुसन्धान भइरहेको बताए। ग्याङ फाइट गर्ने नेपाली हङकङका स्थायी बासिन्दा भएको बुझिएको छ।

केही दिनअघि मात्र ब्याट्री स्ट्रिटमा ४ जना नेपाली युवाले ५१ वर्षीय चिनियाँ पसलेमाथि हातपात गरेका थिए । त्यो घटनाले स्थानीय चिनियाँहरु नेपाली युवामाथि क्रुद्ध थिए । ति युवालाई पक्राउ गर्न प्रहारमाथि दबाब परेको थियो।

हङकङमा ग्याङ फाइट गर्ने नेपालीमाथि गोली चलाईएको यो दोस्रो घटना हो। यसअघि २००५ मा आफुमाथि प्रहार गरेको आरोपमा प्रहरीले दिलबहादुर लिम्बुलाई गोली हानी मारेको थियो ।