असोज १५, पोखरा : ईन्जियिरिङ अध्ययन संस्थान पश्चिमाञ्चल क्याम्पस लामाचौर पोखराका विद्यार्थीले सौर्य उर्जाबाट चल्ने कार निमार्ण गरेका छन् । मेकानिकल विभाग अन्तर्गत बिई अन्तिम बर्षका बिद्यार्थीले डेढ महिनाको परि श्रमपछि चार जनाको सिट क्षमता भएको कार निमार्ण गरेका हुन् ।

पोखराका सौगात कोइराला, हेटौडाका सुमीत ढकाल, नवलपरासीका राजन खनाल, बद्रियाका सागर अधिकारी, चितवनका प्रयास रिमाल, स्याङ्जाका कृष्णप्रसाद तिमिल्सिना, मोरङका खगेन्द्र कार्की र दोलखाका दिपेश कार्कीले करिव तीन लाखको लागतमा सौर्य उर्जावाट चल्ने कार बनाएका हुन् । आठ जना बिद्यार्थीले आफ्नै सृजना र लगानीमा कार निमार्ण गरेको बताए ।

बिद्यार्थीहरुले चेसीज र फ्रेम आफ्नै डिजाइनमा कलेजकै वर्क सपमा शिक्षकसँग सहकार्य गरि बनाएका हुन् । सौर्य उर्जाबाट चल्ने गाडीमा अरु गाडीको जस्तो इन्जिन हुदैन । इलेक्टिक भेकल भएकाले ९ सय वाडको डिसी मोटर प्रयोग गरेर बनाएको बिद्यार्थी सागर अधिकारीले बताए । कारको बडी कलेजको पुरानो कारलाई मोडीफाई गरेर बनाएको र केही सामान बजारबाट किनेको उनले बताए । अहिलको यो कार मोडल कार मात्र हो । ८ लाखमै हामीले व्यावसायीक डिलक्स कार नै बनाउन सक्छौ तर सरकारको सहयोग आवश्यक रहेको उनले बताए ।

नाकावन्दिपछि देशले भोग्नु परेको इन्धन अभावबाट आत्मनिर्भर हुनु पर्छ भन्ने भावनाले निशुल्क पाइने सौर्य उर्जाबाट चल्ने कार बनाउने सोच आएको बिद्यार्थी दिपेश कार्कीले बताए । यहि सोचले ८ जना साथीको मेहनतले डेढ बर्ष लगाएर कार बनाएको उनले सुनाए । यो कार नै नेपालमा बनेको पहिलो सौर्य उर्जाबाट चल्ने कार भएको बिद्यार्थीको दावी छ ।

सौर्य उर्जाबाट चल्ने कारको प्रयोगले पेट्रोल, डिजेलकालागि बाहिरीने रकम केही हदसम्म रोकीनुको साथै प्रदुर्षण कम भई वातावरण स्वच्छ राख्न सहयोगी पुग्ने बिद्यार्थी कृष्णप्रसाद तिमिल्सिनाले बताए । डिजेल, पेट्रोलबाट फाल्ने कालो धुवाको कारण स्वास्थ्यमा असर पर्ने भएकाले वातावरण मैत्री कारले वातावरण पनि स्वच्छ हुने उनले सुनाए ।

कारमा ९ सय वाटको डिसी मोटर र १२ भोल्टको एक सय वाटका चार ब्याट्री जडान गरिएको छ । कारमा एक सय ५० वाटको २ वटा सोलर प्यानलको प्रयोग गरिएको बिद्यार्थी समीर ढकालले बताए । चार जनाको सिट क्षमता भएको कार ३० किलोमिटर प्रतिघन्टा गति क्षमता भएको उनले जानकारी दिए । सौर्य र विद्युत दुबैबाट चार्ज गर्न मिल्ने यो कार दिनमा १६ घण्टा सौर्य उर्जामा चार्ज गर्दा ३ घण्टा चल्ने र बिद्युतवाट ६ घण्टा चार्ज गरे ६ घण्टा चल्ने बिद्यार्थी सौगात कोइरालाले सुनाए ।

राज्यले सहयोग गरे देशलाई परनिर्भरता कम गर्न डिलक्स सोलार कार तयार गरिने कोइरालाको भनाई छ । सौर्य उर्जाबाट चल्ने कार बनाउनु अघि वैकल्पिक उर्जा केन्द्र, बिज्ञान तथा प्रविधि प्रतिष्ठान र बिभिन्न मन्त्रालयमा धाउँदा पनि सहयोग नपाएको बिद्यार्थीको गुनासो छ ।