असोज १३ – पैसा कमाएर परिवारलाई सुखी बनाउने सोच बोकेर वैदेशिक रोजगारीका लागि हिँडेका धेरैको परिवार अहिले पिडामा छ । भनेजस्तो कमाइ नहुँदाको पिडा त छँदैछ, कतिपयको राम्रै कमाइ हुँदाहुँदै पनि परिवार छिन्नभिन्न भएको छ ।

अर्घाखाँचीको नुवाकोट ४ घोराखरीका ठाकुर प्रसाद आचार्य र उहाँकी श्रीमती रिना आचार्य अहिले यस्तै समस्यामा हुनुहुन्छ । झन्डै १० वर्ष इजरायलमा कमाएको पैसाले सुख भन्दा धेरै पिडा दिएको छ । दिएको आनन्द भन्दा त्यही पैसाले परिवारलाई दिएको खुशी एकाएक लुटिएको छ ।
रिना १० वर्ष अघि केयर गिभरको रुपमा इजरायल पुग्नु भएको थियो । दुई वर्ष पछि उहाँका श्रीमान ठाकुर पनि इजरायल पुग्नुभयो । केयर गिभरकै रुपमा काम गर्न पुगेका ठाकुर आठ वर्ष काम गरेर गएको डेढ वर्ष अघि नेपाल फर्कनुभयो ।

इजरायल जानुअघि छोरा र छोरीले राम्रो पढुन भन्ने उद्देश्यले काठमाडौमा रिनाकी बहिनीको जिम्मामा छोडेर जानु भएको थियो । तीनकुनेमा रहेको भिएस निकेतनमा छोरा र नेपाल आर्मी स्कुलमा छोरीलाई भर्ना गरेर गएका उहाँहरुको छोरा र छोरीले राम्रै पढिरहेका थिए ।

छोराछोरीकै रेखदेखका लागि नेपालमै बस्ने सोचेर ठाकुर डेढ बर्ष पहिले नेपाल फर्किनु भएको हो । नेपाल आएर ठाकुरले आफूसँगै राखेर छोराछोरी पढाउदै हुनुहुन्थ्यो । उता इजरायलमै रहेकी रिनाको परिवारसँग नियमित सम्पर्क थियो । घरखर्च र छोराछोरी पढाउन रिनाले नै पठाउने गर्नुभएको थियो ।

गएको भदौ ३१ गते शुक्रबार साँझ ठाकुर र उहाँका १६ वर्षिय छोरा मनिषबिच सामान्य विवाद भयो, स्कुलमा तिर्नु पर्ने शुल्कका विषयमा । विषय सामान्य थियो । छोरा अचानक रिसाए । वुवाले सम्झाउने प्रयास गरिरहेका थिए ।

राती सुत्नुअघि विद्यालयमा तिर्ने शुल्कको बारेमा बाबुछोराबिच विवाद भएको थियो । छोरा मनिषलाई ठाकुरले विद्यालय पुगेर प्रिन्सिपल र अरु सरम्याडमसित आफैं कुरा गरेर समस्या समाधान गर्ने भन्दै सम्झाइरहनु भएको थियो । तर मनिषले बुवाको कुरा वास्ता गरेका थिएनन ।

असोज १ गते बिहान ४ बजे उठेर मनिष सर्ट पाइन्ट र जुत्ता लगाएर घरबाट निस्किए । मर्निङवाकमा गएको होला भनेर ठाकुरले खासै वास्ता गर्नु भएन । तर मनिष दिनभर घरमा नफर्किए पछि परिवारमा चिन्ता छायो । अर्को दिन पनि घर फर्किएनन । घर नफर्किए पछि ठाकुरले प्रहरीमा निवदेन दिनुभयो । प्रहरीले मनिषको खोजी गरिरहेको छ ।

हजुरआमा र बुवा अस्पतालमा

छोरा हराएपछि ठाकुरलाई हृदयघात भयो । उहाँलाई अस्पताल भर्ना गरिएको छ । नाती हराएको चिन्ताले हजुरआमा गएको एक हप्तादेखि वीर अस्पताल भर्ना हुनुभएको छ ।

छोरा हराएको र श्रीमान अस्पताल भर्ना भएपछि रीना इजरायलबाट नेपाल फर्किनु भएको छ । रिनाले सामाजिक सञ्जाल मार्फत छोरा मनिषलाई आफूलाई लिन एयरपोर्ट आउन भनेर अनुरोध गर्नुभएको थियो । तर मनिषले त्यसको कुनै वास्ता गरेनन ।

रिना नेपाल आएर बाबु अस्पताल भर्ना भएकोबारे फेरी सामाजिक सन्जालमा लेखेपछि मनिषले आफु सञ्चै राम्रै रहेको र स्कुल भर्ना भएर पढ्न थालेको भन्दै फेसबूकमा म्यासेज त गरे तर कहाँ कस्तो अवस्थामा कुन विद्यालयमा भर्ना भएको हो, केही जानकारी दिएका छैनन् ।

म्यासेजको अन्तिममा आफू घर फर्कन नसक्ने भन्दै मनिषले लेखेको देखेपछि रिना पनि बेहोस अवस्थामा हुनुहुन्छ । बुधवार होश खुलेपछि गहभरी आँशु झार्दै रिनाले भन्नुभयो ‘छोरो तिमी जहाँ छौ, मेरो लागि भए पनि एक पटक मुख देखाउन आउ । होइन भने अब हामी बाँच्नुको अर्थ के भयो ? तिम्रै भविष्य बनाउन विदेश गएँ, अहिले तिम्रै कारणले फर्किएकी छु । जसरी हुन्छ सक्दो छिट्टो घर फर्किदेउ ।’

ठाकुर र रिना सामाजिक अभियन्ता पनि हुनुहुन्छ । उहाँहरु इजरायलमा हुँदै अन्तर्राष्ट्रिय अर्घाखाँची सम्पर्क मञ्चमा आवद्ध हुनुभएको थियो । उहाँहरुले सामाजिक सन्जालमार्फत आफ्नो छोरा खोजी गरिदिन अनुरोध गर्नुभएको छ । अन्तर्राष्ट्रिय अर्घाखाँची सम्पर्क मञ्चका संयोजक राजु खड्काले खोजी अभियान सञ्चालन गरिएको बताउनुभयो । @ उज्जायालो अनलाइन |