असोज ११, विराटनगर : विराटनगरको व्यस्त बजार बुधहाटचोकस्थित हनुमान मन्दिरनजिकै रोकेको बलेरो गाडीबाट दिनदहाडै २५ लाख रुपैयाँ चोरी भएको छ । २४ घण्टै प्रहरीको तैनाथ हुने उक्त ठाउँबाट भएको उक्त चोरीलाई प्रहरीले ‘नाटकीय’ घटनाको संज्ञा दिएको छ ।

तेह्रथुमबाट दशैंका लागि नयाँ नोट साट्न तेह्रथुमको बसन्तपुरस्थित माउण्ट मकालु डेभलपमेन्ट बैंकको शाखा कार्यालयका कर्मचारीहरू– चालक वीरबहादुर लिम्बू र सिनियर असिस्टेन सुमन लिम्बू विराटनगरस्थित नेपाल राष्ट्र बैंक आएका थिए । विराटनगरको जलजला चौकमा रहेको माछापुच्छ्रे बैंकबाट पैसा निकालेर साट्नका लागि राष्ट्र बैंक जाने तयारी गरिरहेका बेला पैसा चोरी भएको उनीहरुले बताएका छन् ।

‘पैसा निकालेर बी प्लट पुग्दा एक्कासि घाँटी चिलायो । घाँटीमा डाबर नै डाबर आयो,’ बैंकका सिनियर असिस्टेन सुमन लिम्बूले भने, ‘झुस बिजेको जस्तो लाग्यो । पैसा हालेको झोला गाडीमा राखेर नजिकै रहेको ट्युबेलमा घाँटी धोएर फर्कदा गाडीको सिसा फुटाएर पैसा चोरी भएको थाहा भयो ।’

वडा प्रहरी कार्यालय विराटनगरका डीएसपी संजयसिंह थापाले रोकिएको को १ त ८०१९ नम्बरको बलेरो गाडीको चालक बस्नेभन्दा देब्रे सिटको सिसा फुटाएर जेब्रा झोलामा राखेको २५ लाख रुपैयाँ अज्ञात समूहले चोरी गरेको भनिएको घटनालाई प्रहरीले शंकास्पद रुपमा हेरेको बताए । ‘गाडीको सिसा फुटाएर पैसा चोरी भयो भनिएको छ,’ उनले भने, ‘बाँकी कुरा अनुसन्धानबाट खुल्दै जाने छ ।’ उनले प्रहरी घटनास्थलमा पुग्दा सिसा फुटेको अवस्थामा पैसा राखेको भनिएको गाडी पार्किङ थियो । उक्त गाडी जिल्ला प्रहरी कार्यालय मोरङमा राखिएको छ ।

गाडीको सिसा फुटाएर पैसा चोरी गर्नेको कुनै पनि हुलिया नभएको प्रहरीको भनाइ छ । ‘व्यस्त बजारमा पैसा चोरी गरेको देख्ने पनि कोही छैनन्,’ थापाले भने, ‘प्रहरीले वरिपरिका सबैसँग सोधीखोजी पनि गरिरहेको छ ।’ उनका अनुसार घटनामा संलग्नलाई नियन्त्रणमा लिन भने सकिएको छैन ।

प्रहरीले पैसा कसरी चोरी भयो भनेर पूर्ण रुपमा खुल्न नसकेका कारण घटनालाई संकास्पद रुपमा हेरिएको जनाएको छ । ‘घटना भएको देख्ने कोही पनि नभएका कारण थप जानकारी पाउन कठिन भइरहेको छ,’ डीएसपी थापाले भने, ‘हामीले सबै कोणबाट अनुसन्धान थालिसकेका छौं । कस्तो मानिसले सिसा फुटाए भन्ने विषयमा खोजी भई रहेको र नजिकैको सीसी टिभी फुटेजबाट हेरेर पत्ता लगाउने तयारी भइरहेको छ ।’