बौद्धनाथ पुनर्निर्माण रोक्न चलखेल, पुनर्निर्माण कुनै पनि हालतमा नरोक्न मन्त्रीको निर्देशन
काठमाडौं – बौद्ध क्षेत्रका संघसंस्था र नागरिक समाजका अगुवाहरूले भूकम्पबाट क्षतिग्रस्त बौद्ध स्तूपको पुनर्निर्माणमा अवरोध पुर्याउन चलखेल भइरहेको भन्दै मंगलबार संस्कृति, पर्यटन तथा नागरिक उड्डयनमन्त्री जीवनबहादुर शाहीलाई ज्ञापनपत्र बुझाएका छन् । जापानका लागि पूर्वराजदूत गणेश योञ्जनको नेतृत्वमा गएको टोलीले मन्त्रीसमक्ष बुझाएको ज्ञापनपत्रमा ‘धार्मिक सदभाव भँडाउने नियत राखेर बौद्धमा केही तत्त्व सक्रिय भएको’ उल्लेख गरेको छ ।
पुनर्निर्माण रोक्न चलखेल गर्नेलाई कारबाहीको मागसहित नेपाल बौद्ध महासंघ, नेपाल तामाङ घेदुङ, बौद्ध जागरण केन्द्र, भुवाल डाँडा युवा क्लब, तामाङ बौद्ध महासंघ, सरस्वती नगर सुधार संघ लगायत संघसंस्थाले मन्त्रीको ध्यानाकर्षण गराएका हुन् । ‘पुनर्निर्माण रोक्न र सामाजिक–धार्मिक सदभाव बिथोल्न केही तत्त्व परिचालित भएको देखियो,’ योञ्जनले भने, ‘बौद्धमै नभएको छद्म मान्छेको नामबाट विभिन्न अनलाइनमा पुनर्निर्माणसम्बन्धी दुस्प्रचार भइरहेको पाएपछि हामी सम्बन्धित निकायमा आएका हौं ।’ उनले गलत प्रचार गर्ने मिडियाबारे सप्रमाण प्रेस काउन्सिलमा उजुरी दिएको बताए ।
ज्ञापनपत्र बुझेपछि मन्त्री शाहीले ‘पुनर्निर्माण कुनै पनि हालतमा नरोक्न र अघि बढाउन’ निर्देशन दिए । ‘त्यहाँ के भइरहेको छ, हामीले पनि गम्भीर अब्जर्बेसन गरिरहेका छौं,’ उनले भने, ‘तपाईंहरू काम नरोक्नूस्, अगाडि बढ््नूस् ।’
गत वैशाख १२ र त्यसपछिका परकम्पले क्षतिग्रस्त बौद्ध स्तूपको स्थानीय बासिन्दा र संघसंस्थाकै पहलमा पुनर्निर्माण थालिएको हो । यसको संयोजन बौद्धनाथ क्षेत्र विकास समितिले गरिरहेको छ ।
समितिका अध्यक्ष सम्पूर्णकुमार लामाले पुरातत्त्व विभागको स्वीकृति, सिफारिस र निगरानीमा पुनर्निर्माणसम्बन्धी काम भइरहेको जनाए । पुनर्निर्माणको लागत १८ करोड छ । समिति र स्थानीय संघसंस्थाको पहलमा १४ करोड रकम उठेपछि पुनर्निर्माण थालिएको हो । भूकम्पपछि पुनर्निर्माण थालिएको यो नै पहिलो विश्व सम्पदा हो । समितिले यसको पुनर्निर्माण केही महिनामै सकिने जनाएको छ । @ इकान्तिपुर |
