काभ्रे, २ असोज | जिल्ला स्थित राजनीतिक दलहरु लामो रस्साकस्सी र छलफल पछि काभ्रे जिल्लामा एक उपमहानगरपालिका सहित १२ स्थानीय तह बनाउन सहमत भएका छन् । दलहरुको सहमति अनुसार अब जिल्लामा एक उपमहानगरपालिका, तीन नगरपालिका र ८ वटा गाउँ पालिका हुने भएका छन् ।

उप महानगरपालिकाका लागि यस अघि नगरपालिका भएका धुलिखेल, बनेपा, पनौती सहित टुकुचा नाला, उग्रचण्डी नाला, देविटार, रविओपी, पातलेखेत, शारदा बतासे, शंखुपार्टीचौर, बल्थली, महेन्द्रज्योती, उग्रतारा जनागाल, कुशादेवी, रयाले र नासिकासाँगालाई एकिकरण गर्ने सैद्धान्तिक सहमति भएको छ । तीन नगरपालिका र १४ गाविसको जनसंख्या १ लाख ३५ हजार ६ सय १४ रहेको छ । पाँचखाल नगरपालिकामा दोलालघाट, खरेलथोक र कोशिदेखा गाविस समायोजनको प्रस्ताव गरिएको छ ।

त्यस्तै दाप्चा काशिखण्ड नगरपालिकामा श्यामपाटी सिमलचौर, कानपुर कालापानी र कटुञ्जेवेशी समेटिएको छ । त्यस्तै गैह्रिविसौना देउपुर, बालुवापाटी देउपुर, नयाँगाउँ देउपुर, महादेवस्थान, चण्डेनीमण्डन, जैसिथोक र ज्याम्दी गाविसलाई समेटेर ३५ हजार ८४ जनसंख्या रहेको नयाँ नगरपालिका प्रस्ताव गरिएको छ ।

स्थानीय निकाय पुर्नसरचना आयोगले काभ्रेपलाञ्चोक जिल्लालाई ११ तह बनाउन प्रस्ताव गरेको थियो । काभ्रेका ७५ गाविस र ५ नगरपालिकाको सेवा र सुविधा अब १२ वटा स्थानीय तहबाट हुनेछ । उप सचिव प्रमुख हुने गरी ७० जना कर्मचारीबाट जनतालाई सेवा सुविधाहरु उपलब्ध गराईनेछ ।

गाउँपालिहरुका लागि सापिङ्ग, भुम्लुटार, चौबास, बेखसिम्ले, सिम्थली, सल्लेभुम्लु, सानोवाङ्गथली, नाग्रगगर्चे गरी १५ हजार ६ सय जनसंख्या रहेको गाउँपालिका प्रस्ताव रहेको छ ।

१९ हजार ५ सय ९० जनसंख्या रहेको कलाँती भुम्लु, धुसेनी शिवालय, गोठपानी, विर्तादेउराली, माझिफेदा, पोखरीचौरी, कात्तिकेदेउराली, माँदनकुँडारी र फलाँटे गाविसको गाउँपालिका, २० हजार १ सय ९२ जनसंख्या रहेको भिमखोरी, वाल्टिङ्ग, मंगलटार, खार्पाचोक, सिपाली चिलाउने, शिशाखानी, महादेवटार गाविसको गाउँपालिका, २२ हजार ८ सय ८२ जनसंख्या रहेको शिखरआम्बोटे, खहरेपाँगु, महांकालचौर, च्यासिङ्कखर्क, चलाल, ढुंखर्क र च्याम्ब्राङ्गबेशी गाउँपालिका प्रस्ताव गरिएको छ ।

यस्तै २२ हजार ७ सय १२ जनसंख्या रहेको संस्र्युखर्क, सरमथली, बोल्देफेदिचे, ठुलोपर्सेल, पोखरीनारयाणस्थान, कुरुवास चापाखोरी, मेच्छे गाउँपालिका, १८ हजार २ सय ८३ जनसंख्या रहेको बुढाखानी, बनखुचौर, फोक्सिङ्गटार, घर्तिछाप, गोकुले गाउँपालिका, १४ हजार ३ सय ९८ जनसंख्या रहेको मिल्चे, साल्धारा, फलामेटार, डाँडागाउँ, साल्मेचाकल गाउँपालिका रहेका छन् । डाँडापारीमा दुई गाउँपालिका छन् भने कोशिपारीमा पनि दुई गाउँपालिका प्रस्ताव गरिएको छ ।

@मेचीकाली