असोज २, लमजुङ: मानब बेचबिखन तथा ओसारपसार मुद्दामा कारागार चलान भएकी एक महिलाले २० हजार धरौटी रकम तिर्न नसक्दा नाबालक छोरा सहित जेलमा बस्न बाध्य बनेकी छन् । नवलपरासीको कावासोती घर र लमजुङको बिचौर माईत बताउने ३५ बर्षीय सुकमायाँ मिजारसँगै उनका ६ बर्षीय छोरा सुजन मिजार पनि जेलमै बस्न बाध्य बनेका हुन् ।

जिल्ला अदालत लमजुङले २०७३ भदौ ८ गते उनीमाथि लागेको मानब बेचबिखन तथा ओसारपसार मुद्दामा २० हजार रकम धरौटी तिर्न आदेश दिएको थियो । तर, उनले सो रकम जुटाउन नसकेपछि जेलमा गएकी हुन् ।

‘घरमापनि आउने बाटो केहि छैन, उनले भनिन, ‘त्यति ठुलो रकम कसरी जुटाउने ? ’ उनले आफुले कुनै अपराध नगरेको तर कानुनलाई मान्न तयार रहेको प्रतिक्रिया दिईन् । आमा जेलमा परेपछि जेलमा बस्दै आएका उनका छोरा सुजनको पठनपाठन पनि प्रभावित हुँदै आएको छ । ‘छोराको बारेमा चिन्ता छ उनले भनिन,‘ पढ्ने बेलाको छोरालाई आफुसँगै जेलमा राख्न पर्दा निकै चिन्तित छु ।’

बालबालिकालाई जेलमा राख्न नपाउने प्राबधान भएपनि उनको उद्धारका लागि बालबालिकाको क्षेत्रमा काम गर्ने सरकारी तथा गैरसरकारी निकायबाट भने खासै चासो भएको छैन् । तर, महिला तथा बालबालिका कार्यालयका प्रमुख बिष्णुकुमारी लामिछाने भने आफुहरू बच्चाको निरन्तर ‘फलोअप’मा रहेको दाब िगर्छिन् । ‘ हामी निरन्तर फलोअपमा छौं, प्रमुख लामिछानेले भनिन, ‘मुद्धाको समय नतोकिएकाले हामी चुप लागेर बसेका हौं ।’ बालकको उद्धारका लागि जिल्ला अदालत लमजुङको फैसला कुरेर बसको उनले बताईन् ।

यसअघि पनि धरौटी रकम तिर्न नसक्दा जेलभित्रै बस्न बाध्य बनेकी एक महिलालाई बेसीशहर स्थित बिद्याबिकास उमाबिको जुनियर रेडक्रस सर्कलमा आबद्ध बिद्यार्थीहरूले रकम संकलन गरेर धरौटी रकम जुटाईदिएका थिए । त्यस्तै जेलमा धरौटी रकम नुहँदा कारागरमा थुनुवा रहेका गोरखा जिल्लाका एक बालकलाई बालबालिका क्षेत्रमा काम गर्ने चेसनेपाल लगायतका संस्थाको पहलमा धरौटी रकम जुटाएर कारगारबाट छुटाईएको थियो ।