भदौं ३१ , नयाँदिल्ली : प्रधानमन्त्री पुष्पकमल दाहालले भारत भम्रण गरेको दोस्रो दिन दुई देशबीच तीन विषयमा महत्वपूर्ण सम्झौता भएको छ । हस्ताक्षर भएका सम्झौतामा नेपालको हुलाकी राजमार्गको प्रोजेक्ट म्यानेजमेन्ट र कन्सल्ट्यान्सी सर्भिस सुरु गर्ने, भूकम्पपछि नेपालको पूनर्निर्माणका लागि भारतले दिने ऋण पूरा गर्ने र ७५ करोड डलर सहुलियत नयाँ ऋण दिने विषय रहेका छन्।

हस्ताक्षरपछि दुवै देशका प्रधानमन्त्रीले पत्रकारहरुलाई सम्बोधन गरेका छन्। हैदरावाद हाउसमा दुई देशबीच सहमति पत्रमा हस्ताक्षर भएपछि हैदरावाद हाउसमै प्रधानमन्त्री दाहाल तथा मोदीले संयुक्त रुपमा पत्रकारहरुलाई सम्बोधन गरेका थिए।

मोदीले नेपालमा समयभित्रै परियोजना सम्पन्न गर्न आफूले मोनिटर गर्ने जनाएका छन्। नेपालको विकास र लोकतन्त्रको सुदृढीकरणमा भारतको निरन्तर सहयोग रहने पनि उनले बताए। शताब्दीयौँ पुरानो सम्बन्धलाई आजको छलफलले अझ बलियो बनाउने विश्वास व्यक्त गरेका छन्।

उनले शान्ति, स्थायित्व र प्रगति नेपाल र भारतको संयुक्त लक्ष्य भएको कुरामा जोड दिएका थिए। प्रधानमन्त्री दाहालले पनि नेपाल र भारतको सम्बन्ध विशेष रहेको भन्दै समकक्षी मोदीलाई नेपाल भ्रमणको निम्ता दिएर आफ्नो सम्बोधन टुंग्याएका थिए।