भदौं ३१ , धनगढी : मोटरसाईकल चोर पक्रिन भन्दै हतियार सहित नेपाल छिरेका तीन जना भारतीय सुरक्षाकर्मी पक्राउ परेका छन । विहीबार अपरान्ह कञ्चनपुरको बेलौरी नगरपालिका–वा नं १४ भूडा गाउँमा हतियार सहित प्रवेश गरेका भारतको पिलिभित जिल्ला कम्पोजनगर प्रहरी चौकीका सई सुवास चन्द, जवानहरु अर्जुन सिह र प्रदीपकुमारलाई ईलाका प्रहरी कार्यालय बेल्डाँडीको टोलीले पक्राउ गरेको हो ।

भारतमा मोटरसाईल चोरीका घटनाका आरोपी श्रवणकुमार सिह नाम गरेका व्यक्तिलाई लिएर तीनैजना प्रहरी कञ्चनपुरको भुडागाउँ पसेका इलाका प्रहरी बेल्डाँडीका प्रहरी निरिक्षक गिन्द्र बोगटीले जानकारी दिए । तीनजना भारतीय सुरक्षाकर्मी र एकजना भारतीय नागरिकलाई विहीबार राती नै द्विदेशीय मामला भएको भन्दै ईलाका प्रहरी कार्यालय बेल्डाँडीले जिल्ला प्रहरी कार्यालय कञ्चनपुरलाई बुझाएको छ ।
कञ्चनपुर प्रहरी प्रमुख, प्रहरी उपरिक्षक तुलसी प्रसाद अधिकारीले श्रवणकुमार सिहले मोटरसाईकल चोरको घर देखाई दिन्छु भन्दै तीनै जना भारतीय प्रहरीलाई नेपाल ल्याएको खुलेको बताए । तर नेपालीको घरमा मोटरसाईल भने फेला परेको छैन ।

भारतीय प्रहरीले भुडा गाउँका बहादुर शाहीको घरमा खान तलासीका लागि आएपनि, अरु स्थानीयको घरमा पनि हतियार सहित पसेर खानतलासी गर्न थालेपछि स्थानीयले विरोध गर्दै ईलाका प्रहरी कार्यालय बेल्डाँडीलाई खबर गरेका थिए । प्रहरीले तीनै जनाबाट एकथान पेस्तोल र ९ राउण्ड त्यसमा प्रयोग हुने गोली बरामद गरेको छ ।

भरतीय सुरक्षाकर्मीले, अनजानमा हतियार ल्याएको बयान दिएको प्रहरीले जनाएको छ । अन्जानमा हतियार सहित आएको बताउने भारतीय सुरक्षाकर्मी र एकजना नागरिकलाई भारतीय प्रहरीका उच्च अधिकारीको जिम्मा लगाउने तयारी भईरहेको कञ्चनपुर प्रहरीले जनाएको छ ।

यसअघि पनि अत्याधुनीक हतियार सहित अछाम र डोटीको सीमाना चौखुट्टेमा भारतीय सुरक्षाकर्मी पक्राउ परेका थिए । भारतीय प्रहरीलाई अर्को देशमा हतियार सहित जानुपर्दैन भन्ने थाहा हुँदा हुदै पनि बेलाबेला यस्ता घटनाहरु हँुदै आएका छन ।