चितवन, ११ भदौ – मुग्लिन नारायणगढ सडकखण्डमा शनिबार फेरि अर्को दुर्घटना भएको छ।

शुक्रबार बिहान बस खसेको ठाउँ नजिकै ट्रक दुर्घटना भएको हो। ना ३ ख ४५५६ नम्बरको ट्रक शनिबार बिहान साढे ५ बजे अनियन्त्रित भएर झण्डै एकसय मिटर तल नदीमा खस्दा ट्रकमा रहेका ७ जना घाइते भएका छन्।

शुक्रबार बस खसेको ठाउँ र शनिबार ट्रक खसेको ठाउँ झण्डै ३ किलोमिटरको दूरीमा रहेको चितवन प्रहरीले जनाएको छ। शुक्रबार बिहान गौरबाट पोखराको लागि छुटेको बस चण्डिभन्ज्याङ गाविस कालीखोलाबाट नदीमा खसेको थियो।

यो ठाउँबाट मुग्लिन २ किलोमिटरको दूरीमा पर्छ। शनिबार ट्रक दुर्घटना भएको ठाउँ जलबिरे मुग्लिनबाट झण्डै ५ किलोमिटरको दूरीमा पर्ने प्रहरीले जनाएको छ।

मुग्लिन–नारायणगढ सडकखण्डको यात्रा जोखिम

बाहिरी जिल्लालाई काठमाडौंसँग जोड्ने मुख्य बाटो मुग्लिन-नारायणगढ सडकखण्डको यात्रा झन् झन् जोखिमपूर्ण बन्दै गएको छ। दिनहुँ दुर्घटनाका खबर सुन्दा यात्रु र चालकलाई चिन्ता थपेको छ।

चीनको सहयोगमा ३४ वर्षअघि बनेको नारायणगढ-मुग्लिन सडकमा अहिले दैनिक ८ हजार गाडी गुड्छन्। पोहोर वैशाखदेखि फराकिलो बनाउन थालिएको यो सडक बिस्तारको काम चलिरहेको छ। त्यसैले पनि सडकमा गाडी चलाउन असहज छ भन्नुहुन्छ नारायाणगढ मुग्लिन सडक निर्माण आयोजनाका इन्जिनियर शिव खनाल।

सडक बिस्तारका क्रममा पहाड फोडिएका कारण ३६ किलोमिटर सडकमा सानाठुला गरी ३२ ठाउँमा पहिरोको जोखिम छ। यसैले यो सडकमा गाडी चलाउन निकै डर लाग्ने बस चालक कृष्ण लामाले बताए।