काठमाडौं, ८ भदौ । नेपाली कांग्रेसले सरकारमा सहभागी हुने बाँकी मन्त्रीको नाम आज टुंगो लगाउँदैछ । पार्टी सभापति शेरबहादुर देउवा, वरिष्ठ नेता रामचन्द्र पौडेल र सरकारमा कांग्रेसको नेतृत्व गरेका उपप्रधानमन्त्री विमलेन्द्र निधिले छलफल गरेर नाम टुंगो लगाउनेछन् ।

पौडेल पक्षलाई समेत चित्त बुझाउनेगरी देउवाले मन्त्रीको नाम टुंग्याउने तयारी गर्नुभएको छ । कांग्रेसबाट मन्त्री बन्नेहरुमा सीतादेवी यादव, अर्जुननरसिंह केसी, शेखर कोइराला, डा. प्रकासशरण महत, बालकृष्ण खाँण, जीवनबहादुर शाही, मीनबहादुर विश्वकर्मा, शङ्कर भण्डारी, गगन थापा, फरमुल्लाह मन्सुर, दीपक गिरी, नविन्द्रराज जोशीलगायतको नाम बढी चर्चामा छ ।

यसअघि गृह मन्त्रालय नपाएका कारण सरकारमा नगएका केसी शिक्षा मन्त्रालयको जिम्मेवारी लिन तयार हुनुभएको छ । यस्तै कोइराला र महतमध्ये एक जनाले परराष्ट्र मन्त्रालय सम्हाल्ने छन् । यसअघि परराष्ट्र मधेसी मोर्चाको लागि छुट्याइएपनि उ सरकारमा जाने, नजाने अनिश्चित भएकाले अहिले कांग्रेसले नै लिने सहमति भएको एक नेताले जानकारी दिए । उनका अनुसार शेखर कोइरालाले परराष्ट्र पाएमा प्रकाशशरण महत मन्त्री बन्नुहुने छैन ।

यस्तै कांग्रेसका युवा नेता गगन थापा मन्त्री बन्ने निश्चित भएको पनि ति नेताले बताए । मंगलबार नेता कृष्णप्रसाद सिटौला र देउवाबिचको छलफलमा थापालाई मन्त्री बनाउनेबारे कुरा भएको हो । कांग्रेसले यसअघि उपप्रधानमन्त्री एवम् गृहमन्त्रीमा विमलेन्द्र निधि र भौतिक पूर्वाधार तथा यातायात व्यवस्थामन्त्रीमा रमेश लेखकलाई पठाइसकेको छ ।

कांग्रेस सभापति देउवा शुक्रबार उपचारका लागि सिङ्गापुर जाने कार्यक्रम भएकाले त्यसअघि नै कांग्रेसबाट सहभागी हुने सबै मन्त्रीलाई शपथ गराउने तय भएको छ । मन्त्रीको टुङ्गो लागेपछि पार्टीमा रिक्त पदाधिकारी र विभागलाई पूर्णता दिने कांग्रेसको तयारी छ ।