काठमाडौ: ‘तामाङ मिडिया अवार्ड २०७३’ अन्नपुर्ण पोष्ट दैनिकमा कार्यरत पत्रकार अर्जुन पाख्रिन तामाङ र शक्ति एफएम मकवानपुरमा कार्यरत दुदुमाया सिङ्तानलाई प्रदान गरिएको छ ।

२२ औं तामाङ प्रशारण दिवसको अवसरमा आयोजित कार्यक्रममा पाख्रिन र सिङ्तानलाई अवार्ड प्रदान गरिएको हो । तामाङ पत्रकारको साझा संगठन तामाङ सञ्चार समूहले प्रत्येक वर्ष १ भदौमा तामाङ प्रशारण दिवस मनाउँदै आएको छ।

२०५१ साल भदौ १ गते रेडियो नेपालबाट पहिलो पटक तामाङ भाषामा समाचार प्रशारण भएको दिनलाई तामाङ प्रशारण दिवसका रुपमा मनाउदै आएको संञ्चार समूहका केन्द्रीय अध्यक्ष जगत दोङले बताए ।

अवार्ड छनोट समितिका संयोजक दुपवाङगेल मोक्तानले भने ‘सञ्चार (छापा र विद्युतीय) क्षेत्रमा क्रियाशील रही तामाङ भाषा, संस्कृति, धर्म लगायतको संरक्षण, प्रवद्र्धन तथा तामाङ समुदायको विकासमा निरन्तर योगदान पुर्याउँदै आएका तामाङ सञ्चारकर्मीलाई प्रत्येक वर्ष तामाङ मिडिया अवार्डबाट सम्मानित गर्दै आएको छ ।’

कार्यक्रमका प्रमुख अतिथि आदिवासी जनजाति राष्ट्रिय प्रतिष्ठानका उपाध्यक्ष चन्द्र गुरुङले तामाङ समुदाय र तामाङ सञ्चारकर्मीले मुलुकको विकास र उन्नतीका लागि महत्वपूर्ण भूमिका निभाएको बताए ।

आदिवासी जनजाति पत्रकार महासंघका अध्यक्ष दण्ड गुरुङले पत्रकारिता क्षेत्रले सबै वर्ग समुदायको समाचारलाई उत्तिकै प्राथमिता दिनु पर्ने बताए । अध्यक्ष गुरुङले समाज परिवर्तनका लागि पत्रकारिता नै शसक्तमाध्यम भएको बताउँदै राज्य मातहतका संञ्चारगृहले पनि विभिन्न जाति धर्म सम्प्रदायको विषयलाई प्राथमिकता दिनुपर्ने बताए ।

नेपाल तामाङ घेदुङका केन्द्रीय महासचिव बाबु घिसिङले तामाङ मिडियालाई फराकिलो बनाउनका लागि र रेडियो नेपालबाट प्रशारित तामाङ भाषाको समाचारलाई समय बढाउनका लागि माग समेत गरेका छन् । @अन्नपुर्ण पोष्ट