काठमाडौं । अमिर बम्जन ‘राष्ट्रिय प्रतिभा पुरस्कार–२०७३’ बाट सम्मानित भएका छन् । अन्तर्राष्ट्रिय युवा दिवसको अवसरमा शुक्रबार उनले राष्ट्रपति विद्यादेवी भण्डारीको हातबाट प्रमाणपत्र र युवा तथा खेलकुदमन्त्री दलजित श्रीपाइलीको हातबाट एक लाख नगद प्राप्त गरेका हुन् ।
थाहा नगरपालिका–१ मकवानपुरमा जन्मिएका बम्जनको शरीरको गर्धनदेखि मुनिको भाग चल्दैन । मुखको सहायताले सुन्दर तस्बिर कोर्ने र जिब्रोको सहयोगबाट ल्यापटप, मोबाइल पनि चलाउने बम्जन बहुआयामिक प्रतिभाका धनी छन् । गीत गाएर मन्त्रमुग्ध पार्न सक्ने बम्जनले गाएको गीत पनि रिलिज भइसकेको छ । आफूले बनाएका चित्रहरूको प्रदर्शनीबाट लाखौं आम्दानी भइरहेको बम्जन बताउँछन् ।

भूकम्पपछिको राहत कार्यक्रमका बेला उनलाई करुणा फाउण्डेसनले भेटेको थियो । त्यसपछि फाउण्डेसनले काठमाडौं ल्याएर उनको प्रतिभा निखार्ने काम गरिरहेको छ ।

हाल उनी करुणा फाउण्डेसनकै सहयोगमा कालिमाटी नजिकैको विशेष स्कुलमा अध्ययन गरिरहेका छन् । त्यस्तै, उनी किरण मानन्धरसँग चित्रकला र न्ह्यु बज्राचार्यसँग गायन कला सिकिरहेका छन् । पछिल्लो समय उनी कविता लेखन कार्यमा व्यस्त रहेको बताउँछन् । @ बाह्रखरी