काठमाडौं, २२ साउन । नेपाली कांग्रेसका नेता इन्द्रबहादुर गुरुङले नेपालमा सहज तरिकाले अधिकार प्राप्त नहुने बताउनुभएको छ । शासकलाई अत्याएपछि मात्र अधिकार पाउने उहाँले बताउनुभयो ।

कोठामा कार्यक्रम मात्र गरेर आदिवासी जनजातिको अधिकार सुनिश्चित नहुने भन्दै उहाँले अधिकार प्राप्तिका लागि आदिवासी जनजातिहरु सशक्त ढंगले आन्दोलनमा उत्रनुपर्ने बताउनुभयो ।

अधिकारका लागि पार्टी त्याग गर्न तयार हुनुपर्ने भन्दै सभासदसभा ककसका पूर्वअध्यक्ष समेत रहेका गुरुङले भन्नुभयो– आदिवासी जनजातिको अधिकार सुनिश्चित हुन्छ भने म पार्टी त्याग गर्न तयार छु, तपाईहरु तयार हुनुहुन्छ ?

विश्व आदिवासी दिवसका अवसरमा नेपाल आदिवासी जनजाति महासंघले गरेको अन्तक्र्रियामा बोल्दै गुरुङले सडकमा अभियन्ताहरुले सशक्त आन्दोलन गर्न सकियो भने सांसदहरुलाई सदन तताउन बल मिल्ने बताउनुभयो ।

स्थानीय निकाय पुनर्संरचनामा आपत्ति

स्थानीय निकायको पुनर्संरचनाप्रति आदिवासी जनजाति सांसदहरुले आपत्ति जनाएका छन् । गाउँपालिका र नगरपालिको संरचना तयार गर्दा जनसंख्यालाई मात्र आधार मान्न नहुने भन्दै आदिवासी जनजाति सांसदहरुले सच्याएर अघि बढ्नुपर्ने बताएका हुन् ।

सांसदहरुले तराई र मधेसमा जनसंख्याको आधारमा संरचना बनाउँदा हुने भएपनि पहाड र हिमाली क्षेत्रमा जनसंख्यालाई मात्र आधार बनाउन नहुने सुझाव उनीहरुको थियो । पहाड र हिमालमा भुगोलको आधारमा समेत गाउँपालिका र नगरपालिका बनाइनुपर्ने सुझाव आदिवासी जनजाति सांसदको छ ।

सांसदहरुले आदिवासी जनजातिका अधिकार संविधानमा सुनिश्चित नभएकाले संशोधनका लागि आफूहरुले पहल गर्ने बताएका छन् । उनीहरुले संसद र सरकारलाई दवावका लागि सडकमा पनि उत्तिकै दवाव जरुरी हुने बताएका छन् ।

कार्यक्रममा एमाले सचेतक गोकुल घर्तीले अहिले निर्धारण गरिएकोभन्दा डबल स्थानीय संरचना बनाउनुपर्ने बताउनुभयो । हाल रहेको इलाका समितिहरुलाई नै गाउँ पालिका बनाएर अघि बढ्दा सहज हुने पनि उहाँको धारणा थियो ।

कांग्रेस सांसद दिलमान पाख्रीनले जनसंख्याकै हिसावले मात्र स्थानीय संरचना बनाउन नहुने बताउनुभयो । भौगोलिकतालाई हेरेर भुगोललाई समेत स्थानीय निकाय पुनसंरचनाको आधार बनाइनुपर्ने उहाँको भनाइ थियो ।

कार्यक्रममा राप्रपाका सांसद परशुराम तामाङ, कांग्रेस सांसद रत्ना शेरचन, नेकपा मालेका सांसद अइन्द्रसुन्दर नेम्बाङ, सांसद यशोदा लामा लगायतले मन्तव्य राख्नुभएको थियो ।

कार्यक्रममा जनजाति महासंघका अध्यक्ष नगेन्द्रकुमार कुमालले विश्व आदिवासी दिवस आदिवासी जनजातिको हकअधिकार राज्यसमक्ष प्रस्तुत गर्ने महत्वपूर्ण दिवस भएकाले अधिकारमुखी आन्दोलनका रुपमा मनाउन सबैमा अनुरोध गर्नुभयो । @abcnewsnepal