काठमाण्डौको सनसिटी अपार्टमेन्टका एक व्यक्तिमा पुनः कोरोना संक्रमण
याम्बु । काठमाण्डौको सनसिटी अपार्टमेन्टमा बस्ने एक पुरुषमा पुनः कोरोना संक्रमण देखिएको छ । केही दिनअघि निको भएर घर फर्किएका भनिएका सो अपार्टमेन्टको ए ब्लकमा बस्ने ५२ वर्षीय पुरुषमा पुनः संक्रमण देखिएको स्वास्थ्य मन्त्रालयले जनाएको छ ।
गत चैत ५ मा बेलायतबाट आएर सनसिटीमा बस्दै आएका उनीसँगै उनकी ८१ वर्षीया आमामा पनि कोरोना संक्रमण भएको बैशाख १ गते पुष्टि भएको थियो । उनीहरुलाई तत्काल पाटन अस्पतालको आइसोलेसनमा राखेर उपचार गरिएको थियो ।
अस्पतालमा राखिएको १० दिनमै ठीक भएको भन्दै अस्पतालले आमा छोरालाई बैशाख ११ गते डिस्चार्ज गरिदिएको थियो ।
उपचारपछि घर फर्किएकाहरुको समेत केही हप्तासम्म नियमित रुपमा स्वाब परीक्षण गर्ने गरिन्छ । यही प्रक्रियाअनुसार ती पुरुषको पुनः परीक्षण गर्दा रिपोर्ट पोजिटिभ आएको स्वास्थ्य मन्त्रालयले जनाएको छ ।
नेपालमा निको भएर घर फर्किएका, तर पुनः संक्रमित भेटिनेको संख्या सोसहित ३ पुगेको मन्त्रालयले जनाएको छ ।यसअघि कोरोनालाई जितेर घर फर्किएका भनिएका रौतहट र वीरगञ्जका गरी २ संक्रमितलाई पुनः संक्रमण पुष्टि भएको थियो ।
पहिलाका संक्रमितलाई निको भएपछि पनि पुनः संक्रमण देखिएपछि यसले अवस्था थप गम्भीर हुनसक्ने भन्दै विज्ञहरुले चिन्ता व्यक्त गर्न थालेका छन् ।