‘३३ किलो सुन खोज्न प्रधानमन्त्री ओली र प्रचण्डको घर जाऔँ’
हेटौँडा । प्रमुख प्रतिपक्षी दल नेपाली कांग्रेसको भ्रातृ संगठन नेपाल तरुण दलका अध्यक्ष जीतजंग बस्नेतले हराएको भनिएको ३३ किलो सुन खोज्न सत्तारुढ नेकपाका अध्यक्षद्वय केपी शर्मा ओली र पुष्पकमल दाहाल ‘प्रचण्ड’को घर जानुपर्ने बताएका छन् ।
प्रदेश नम्बर ३ को हटौडामा बिहीबार आयोजित सरकार विरुद्धको प्रदर्शन पछि आयोजित सभालाई सम्बोधन गर्दै तरुण दलका अध्यक्ष बस्नेतले हराएको भनिएको ३३ किलो सुन खोज्न ओली र प्रचण्डको घरमा जानुपर्ने टिप्पणी गरेका हुन् ।
‘‘३३ किलो सुन काण्ड देखाउँदै सरकार ३८ क्वीन्टल सुन लुकाउन खोजीरहेको छ,’’ उनले भने, ‘‘सुन खोज्न अरु ठाउँ हैन केपी ओली र प्रचण्डको घर जानुपर्छ । त्यही फेला पर्छ सुन ।’’
सरकार दिन प्रतिदिन निरंकुश बन्दै गएको भन्दै बस्नेतले प्रहरी प्रशासनलाई तरुण युवामाथि ज्यादती नगर्न चेतावनी दिए । ‘‘अनेक बहाना बनाएर तरुण युवाहरुलाई दुःख दिने काम बन्द गर्नुस् । हैन भने भोलीको दिनमा हामी हिसाब गर्ने छौँ’’ अध्यक्ष बस्नेतले भने ।
तरुण दलका कोषाध्यक्ष विद्वान गुरुङले सरकार नसच्चिए देशभरबाट तरुण कार्यकर्ता बोलाएर सिंहदरवार घेर्ने चेतावनी दिए । उनले भने, ‘‘सरकार आफ्नो रवैया सच्याओस् । होइन भने देश भरीका तरुण काठमाडौं आएर सिंहदरवार घेर्न आउँछौं ।’’
नयाँ युगको सुरुवातसँगै ओली सरकार चमत्कारी बन्दै गएको टिप्पणी गर्दै कोषाध्यक्ष गुरुङले भने, ‘‘समातिएको सुन तामा हुन थाल्यो । हावा मै पानी जहाज र हावामै रेल पनि चाडैँ आउने छ ।’’
मंगलबारबाट तरुण दलले सरकार विरुद्ध ७ वटै प्रदेशमा सडक आन्दोलन गरिरहेको छ । सरकारको अधिनायकवादी चरित्र, भ्रष्टाचार, महंगी, मूल्यबृद्धी, प्रेसमाथिको हस्तक्षेपसँगै वाइडबडी प्रकरण, निर्मला पन्त हत्या प्रकरणलगायतका गैर–कानुनी र अलोकतान्त्रिक क्रियाकलाप विरुद्ध तरुण दल सडक आन्दोलनमा उत्रिएको महासचिव भुपेन्द्रजंग शाहीले बताए ।
मंगलबार प्रदेश नम्बर १ को विराटनगरबाट सुरु भएको सरकार विरुद्धको प्रदर्शन माघ १४ गते सुदूरपश्चिमको धनगढीमा पुगेर सम्पन्न हुने बताइको छ । तरुण दलले बुधबार प्रदेश नम्बर २ को जनकपुरमा प्रदर्शन गरेको थियो । बार्हखरिबाट |