फाल्गुनन्द जयन्तीमा स्थानीय तहले दियो सार्वजनिक बिदा
इलाम-एक नगरपालिका र दुई गाउँपालिकाले फाल्गुनन्द जयन्तीको सार्वजनिक विदा दिने निर्णय गरेको हो । महागुरु लिङ्गदेनको १ सय ३४ औं जन्मजयन्तीको अवसरमा माङसेवुङ र फाकफोकथुम गाउँपालिका तथा माइ नगरपालिकाले विदा दिएका हुन् ।उक्त दिन गाउँपालिका र नगरपालिकाभित्रका सम्पूर्ण सरकारी कार्यालय तथा विद्यालहरुमा विदा दिइने भएको छ । यी क्षेत्रमा विभिन्न कार्यक्रम गरी जन्म जयन्ती मनाउने तयारी छ ।
माइ नगरपालिकाले नगरका विभिन्न पाँच स्थानमा किराँत धर्मावलम्बीहरुको आयोजनामा विभिन्न कार्यक्रम गरी जन्मोत्सव मनाउने भएको छ । यस्तै माङसेवुङ गाउँपालिकामा गुरुनीजि आश्रम कृषि उपसमितिको आयोजनामा गजुरमुखीमा कार्यक्रम गर्नेछ ।
फाकफोकथुम गाउापालिकाले किराँत माङ्गहिम संरक्षण समितिको आयोजनामा एकतप्पाको रुपाटारस्थित किराँत माङ्गहिममा विभिन्न कार्यक्रम गरी जन्मोत्सव मनाउने तयारीमा जुटेको समितिका सदस्य पञ्च योङहाङले बताए ।
इलामको माङसेवुङ गाउँपालिका धर्मगुरु लिङदेनकाे जन्मथलो, फाकफोकथुममा आश्रम बनाएर बसेको र देउमाई नगरपालिका–२ को खत्रक्पामा ज्ञान हासिल गरेको स्थान माइनगरपालिकाको नजिक पर्ने भएकाले तीनवटै स्थानीय तहमा सार्वजनिक विदा दिने निर्णय गरेको माइ नगरपालिका प्रमुख दीपककुमार थेवेले बताए ।
गुरुको जन्मोत्सवको अवसरमा सार्वजनिक विदा दिइनु पर्ने माग सम्वन्धित धर्मालम्बीले गर्दै आएका थिए ।
विसं १९४२ कात्तिक २५ गते इलाम जिल्लाको इभाङ–५ चुक्चिनाम्बामा बाबु जगनबाज लिम्बू र आमा हंसमती लिम्बूको कोखबाट साहिँला छोराका रूपमा फाल्गुनन्दको जन्म भएको थियो ।
किराँत धर्मका महागुरु फाल्गुनन्द लिङ्देनको २००५ चैत २२ गते निधन भएपछि विभिन्न किराँत सङ्घसंस्थाले हरेक वर्ष कात्तिक २५ गते फाल्गुनन्द जयन्ती मनाउँदै आएका छन् । सरकारले २०६६ मङ्सिर १६ गते राष्ट्रिय विभूति घोषणा गरेको थियो