नेकपाको इन्चार्ज र अध्यक्षको भूमिका के फरक छ ?
नेपाल कम्युनिष्ट पार्टीले प्रदेशमा इन्चार्ज र अध्यक्ष तोकेको छ। नेकपाले स्थायी समितिमा रहेका नेताहरुलाई इन्चार्जको भूमिका दिएको हो। पार्टी एकिकरण भएको लामो समय बितिसक्दा समेत नेकपाले प्रदेशमा नेतृत्व चयन गर्न सकिरहेको थिएन। नेकपाको जिल्ला नेतृत्वका विषयमा भने विवाद कायमै छ।
नेकपाले विधानमा प्रदेशमा इन्चार्ज र अध्यक्षको व्यवस्था गरेको छ। नेकपाको विधान तयारमा संलग्न नेता बेदुराम भुषालले प्रदेशमा इन्चार्ज सिनियर हुने बताए। ‘इन्चार्जको काम केन्द्रको नीति तथा निर्णय कार्यान्वयन गराउने हुन्छ’, भुषालले भने।
तर प्रदेशमा शक्तिशाली भने अध्यक्ष हुनेछन्। अध्यक्षले प्रदेश परिषद्, प्रदेश कमिटी, सचिवालयको नेतृत्वको साथ साथै कार्यालय सञ्चालनको काम गर्ने विधानमा उल्लेख छ।
नेकपाका केन्द्रीय सदस्य विष्णु रिजालले पहिला देखि नै तत्कालिन एमालेमा प्रदेशमा इन्जार्ज र जिल्ला अध्यक्ष रहने व्यवस्था रहेको उल्लेख गरे। यसपटक प्रदेश इन्चार्ज र प्रदेश अध्यक्ष व्यवस्था र अध्यक्षको व्यवस्था गरिएको उनले उल्लेख गरे। रिजालले विधानमा स्पष्ट दुई पदाधिकारीको कार्य तोकिएकाले जिम्मेवारीको विवाद नहुने बताए।
नेकपाले प्रदेश १ का इञ्चार्जमा भीम आचार्य र प्रदेश कमिटी अध्यक्षमा देवराज घिमिरेलाई नियुक्त गरेको छ। प्रदेश २ का इञ्चार्जमा सत्यनारायण मण्डल तथा प्रदेश कमिटी अध्यक्षमा प्रभु साह, प्रदेश ३ इञ्चार्जको जिम्मा अष्टलक्ष्मी शाक्य र अध्यक्षमा हितमान शाक्य चयन भएका छन्।
यसैगरी गण्डकी प्रदेशको इञ्चार्ज र अध्यक्ष क्रमश: पृथ्वीसुब्बा गुरुङ र हितराज पाण्डेलाई बनाएको नेकपाले प्रदेश ५ को इञ्चार्जमा शङ्कर पोखरेल र पार्टी कमिटी अध्यक्षमा ओनसरी घर्तीलाई चयन गरेको छ ।
कर्णाली प्रदेश इञ्चार्जमा जिम्मा जनार्दन शर्मालाई र पार्टी कमिटी अध्यक्षमा गोरखबहादुर बोगटीलाई दिएको छ। यस्तै प्रदेश ७ इन्चार्ज भीमबहादुर रावललाई तोकिएको छ भने अध्यक्ष कर्णहादुर थापालाई बनाइएको छ।