दिपेन्द्र तामाङलाई ग्लोबल पिस अवार्ड
काठमाडौं । जनता टेलिभिजनका कार्यकारी निर्माता ग्लोबल पिस अवार्डबाट सम्मानित भएका छन् । दक्षिण कोरियाको राजधानी सोलमा आइतवारबाट शुरु भएको विश्व शान्ति सम्मेलनको अवसरमा जनता टेलिभिजनकर्मी दिपेन्द्र तामाङ उक्त अवार्डबाट सम्मानित भएका हुन् ।
पत्रकारिताको क्षेत्रबाट विश्व शान्तिको स्थापनामा उल्लेख्य योगदान पुर्याएकोमा तामाङ सहित तामाङ सहित विभिन्न देशका ७ पत्रकारहरु लाई उक्त अवार्ड प्रदान गरिएको हो । एचडब्लुपिएलका अध्यक्ष तथा विश्व शान्ति अभियानका प्रमुख अभियान्त मान ही लीले सम्मानित पत्रकारहरुलाई अवार्ड प्रदान गरेका थिए ।
यसैबीच तेस्रो विश्व शान्ति सम्मेलन आइतवारबाट शुरु भएको छ । उद्घाटन सत्रमा अध्यक्ष मान ही ली र आइडब्लुपीजीका अध्यक्ष नाम ही किमले शान्ति अभियान र विश्वमा शान्तिको अवस्था,सम्भावना,चुनौती र योजनाका बारेमा विभिन्न मुलुकका पत्रकारहरुले सोधेको प्रश्नको जवाफ दिएका थिए । सम्मेलनमा विश्वका सयभन्दा बढी मिडिया हाउसका पत्रकारहरु सहभागी छन् ।
सो अवसरमा अध्यक्ष मान ही लीले विश्वमा शान्तिको पुनस्थापना र सुनिश्चितताकालागि जनता र सरकार दुवै सचेत र कटिबद्द हुँदै गएको भन्दै प्रसन्नता व्यक्त गरे । एक एक गरेर हरेक देशमा फैलिदै गएको शान्तिप्रतिको विश्वास र चाहनाले सकरात्मक प्रभाव पारिरहेको लीले बताए । आइतवार नै विभिन्न देशकापत्रकार र नीति निर्माताहरुका तर्फबाट विश्व शान्तिको हालसम्मको उपलब्धी,सम्भावना,अवसर र चुनौती लगायतका विषयका ९ वटा कार्यपत्रहरु प्रस्तुत गरिए ।
सम्मेलन मंगलवारसम्म चल्नेछ । @ जनता समाचार |