मदानीमा बिनाको रातो घर
काठमाडौं, वैशाख १४ :साहित्यकार बिना तामाङ “सुनगाभा”ले आइतवार दाङको मदानीमा दर्शक/स्रोतामाझ आफ्नो सिर्जनाको रातो घर ठड्याइन् । साहित्य समूह नेपाल, दाङ र आव्हानको आयोजनामा भएको “मदानी मन्थन”मा साहित्यकार बिनाको कवितासङ्ग्रह ‘रातो घर’ ठडिएको हो ।
समकालीन नेपाली कविता लेखनको क्षेत्रमा चर्चित हस्ताक्षर बिना २०३७ सालमा मकवानपुरको हेटौडा नगरपालिका– ९ मा जन्मिएकी हुन् । शिक्षण पेशामा आवद्ध भए पनि नेपाली साहित्यिक फाँटमा उनको लोभलाग्दो क्रियाशीलता देख्न सकिन्छ । यसअघि नै “छुकी” शीर्षकको कथासङ्ग्रह २०६९ सालमै पाठकमाझ पस्किएकी बिनाको दोस्रो कृति हो– रातो घर ।
तामाङ डाजाङको सहसचिव, विश्व साहित्य महासंघ नेपाल शाखाकी महासचिव, तामाङ साहित्य एकेडेमीको प्राज्ञ सदस्य तथा बाग्द्वार साहित्य समाज बुढानीलकण्ठको कोषाध्यक्षको भूमिकामा उत्तिकै क्रियाशील बिना समाजशास्त्रमा स्नातकोत्तर छिन् । द ह्वाइट जोन नेपालले आयोजना गरेको विश्वव्यापी अनलाइन कविता प्रतियोगिता २०१२ मा तृतीय पुरस्कार हात पारेकी बिनाले बहुभाषिक राष्ट्रिय कविता गोष्ठी २०७० मा सर्वोत्कृष्ट पुरस्कार पनि जितिसकेकी छन् ।
साहित्यकार बिना तामाङ “सुनगाभा”को कविता वाचनबाट प्रारम्भ भएको कार्यक्रममा दाङका प्रतिभाशाली कविद्वय नवीन अभिलाषी र घनश्याम अस्तित्वले रातो घरकै कविताहरु वाचन गरेका थिए । त्यसपछि स्वयम् बिनाले “रातो घर”का केही कविता वाचन गरेकी थिइन् । लगत्तै समीक्षक राजेन्द्र गौतमले “रातो घर” कवितासङ्ग्रहमाथि टिप्पणी गरेका थिए ।
समीक्षक गौतमले यान्त्रिकताले थिचेको वर्तमानमा कवयित्री बिना प्रकृतिको ओत लाग्न पुगेको बताउँदै अधिकांश कविताले स्वपहिचान खोजेको औंल्याएका थिए । तामाङ जातिका विम्व र प्रतीकहरु स्वभाविकरुपमा कवितामा आएको चर्चा गर्दै तिनले कृतिलाई कोही साँघुरो बनाएको हुनसक्ने अन्दाज गरेका थिए ।